សមាគមអ្នកនិពន្ធ បើកវគ្គ “សរសេរអត្ថបទភាពយន្ត” កំណត់យកសិក្ខាកាមត្រឹម ២០នាក់

លី ណា — Thu, 30 May 2024 04:05:29 +0000

យោងតាមការជូនដំណឹងរបស់ គណៈកម្មការបណ្តុះបណ្តាល នៃសមាគមអ្នកនិពន្ធខ្មែរ នៅថ្ងៃទី២៨ ខែឧសភា ឆ្នាំ២០២៤ ស្តីពី វគ្គបណ្តុះបណ្តាលអ្នកនិពន្ធ ជំនាន់ទី៣៦ បានឱ្យដឹងថា សមាគមអ្នកនិពន្ធខ្មែរ នឹងបើកវគ្គបណ្តុះបណ្តាលវិជ្ជាតែងនិពន្ធលើមុខជំនាញ “ការសរសេរអត្ថបទភាពយន្ត” ចាប់ពីថ្ងៃប្រកាស រហូតដល់ថ្ងៃទី០៩ ខែមិថុនា ឆ្នាំ២០២៤ ដោយជ្រើសរើសសិក្ខាកាមត្រឹម ២០រូបប៉ុណ្ណោះ។

តាមការបញ្ជាក់ សម្រាប់វគ្គបណ្តុះបណ្តាលលើមុខជំនាញនេះ នឹងចាប់ផ្តើមសិក្សាពីថ្ងៃទី ១០ ខែមិថុនា ឆ្នាំ២០២៤ តទៅ នៅសហសាល រីម គីន ជាន់ទី១ នៃអគារសមាគមអ្នកនិពន្ធខ្មែរ ស្ថិតនៅក្នុងបរិវេណវត្តបទុមវតី សង្កាត់ចតុមុខ ខណ្ឌដូនពេញ រាជធានីភ្នំពេញ ៤ថ្ងៃ/សប្តាហ៍ ពោលគឺចាប់ពីថ្ងៃចន្ទ ដល់ថ្ងៃព្រហស្បតិ៍ វេលាម៉ោង ៥:៣០នាទីល្ងាច ដល់ម៉ោង ៧:៣០នាទីយប់ (រយៈពេលសិក្សាសរុប ៣០ម៉ោង) ។

ទន្ទឹមនឹងការផ្តល់ឱកាសសម្រាប់សិក្ខាកាម ២០រូបនេះ គណៈកម្មការបណ្តុះបណ្តាល បញ្ជាក់ដែរថា ចំពោះអតីតសិក្ខាកាមជំនាន់ទី ៣៤ និង ៣៥ ដែលមានបំណងបន្ត ឬបំពេញបន្ថែមជំនាញនេះ គឺត្រូវបានលើកទឹកចិត្ត និងផ្តល់អទិភាពជូន។

គួរជម្រាបថា សម្រាប់អ្នកដែលមានបំណងចង់ដាក់ពាក្យសិក្សា អាចស្វែងរកដាក់ពាក្យនៅទីស្នាក់ការសមាគមអ្នកនិពន្ធខ្មែរ ដែលស្ថិតក្នុងបរិវេណវត្តបទុមវតីបាន ឬអាចផ្ញើតាមរយៈអុីម៉ែលសមាគម khmerwriterkwa@gmail.com ឬ ទំនាក់ទំនងទៅកាន់ ០១៦ ៧៤០ ៦៥៩ (Telegram) ០៩២/០៨៦ ៧៨៨ ៩៩០ (Telegram) ៕

សម្តេចតេជោ ហ៊ុន សែន គាំទ្រគោលបំណង និងទិសដៅទៅអនាគតរបស់សមាគមអ្នកនិពន្ធខ្មែរ

លី ណា — Mon, 20 Nov 2023 17:49:22 +0000

សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ ព្រះមហាក្សត្រនៃព្រះរាជាណាចក្រកម្ពុជា និងជាប្រធានគណប្រជាជនកម្ពុជា បានអនុញ្ញាតឱ្យឯកឧត្តមបណ្ឌិត ជ័យ ចាប និងប្រតិភូនៃសមាគមអ្នកនិពន្ធខ្មែរ ចំនួន១០រូប ចូលជួបសំដែងការគួរសម នៅវិមាន៧មករា រាជធានីភ្នំពេញ កាលពីថ្ងៃច័ន្ទម្សិលមិញនេះ។

ក្នុងឱកាសចូលជួបសម្តែងការគួរសមនេះ ឯកឧត្តម ព្រឿង ប្រណីត ប្រធានសមាគមអ្នកនិពន្ធខ្មែរ បានជម្រាបជូន សម្តេចតេជោ ពីសកម្មភាពការងាររបស់សមាគមអ្នកនិពន្ធខ្មែរ នាពេលកន្លងមក និងគោលបំណងនៃរៀបចំការ ប្រឡងស្នាដៃតែងនិពន្ធប្រចាំឆ្នាំ របស់សមាគមក្រោមប្រធានបទ “ពានរង្វាន់ ៧មករា សន្តិភាព” ដែលគ្រោងធ្វើឡើង នាពេលខាងមុខ។

ជាមួយគ្នានេះ ប្រធានសមាគមអ្នកនិពន្ធខ្មែរ ក៏បានលើកឡើងពីគោលបំណងនៃការរៀបចំឱ្យមាន ការជួបជុំនៃអ្នកនិពន្ធ របស់បណ្តាប្រទេសតាមដងទន្លេមេគង្គ ដើម្បីធ្វើការពិភាក្សាលើការងារសិក្សាស្រាវជ្រាវ និងទិសដៅទៅថ្ងៃអនាគត លើស្នាដៃតែងនិពន្ធផងដែរ។

ជុំវិញគោលបំណង និងទិសដៅទៅអនាគតរបស់សមាគមអ្នកនិពន្ធខ្មែរនេះ សម្តេចតេជោ ក៏បានបង្ហាញពីការគាំទ្រ របស់សម្តេច បានវាយតម្លៃខ្ពស់ចំពោះស្នាដៃរបស់អ្នកនិពន្ធខ្មែរផងដែរ។

ទន្ទឹមនេះ សម្តេចតេជោក៏បានស្នើដល់សមាគមអ្នកនិពន្ធខ្មែរ ឱ្យមានការបណ្តុះបណ្តាល និងធ្វើការស្រាវជ្រាវ ឱ្យបានគ្រប់ជ្រុងជ្រោយ ដើម្បីឱ្យស្នាដៃរបស់អ្នកនិពន្ធ កាន់តែទទួលបាននូវភាពល្បីល្បាញ និងមានកេរ្តិ៍ឈ្មោះ។
បន្ថែមពីនេះ គឺស្នើឱ្យសមាគមអ្នកនិពន្ធខ្មែរ ចូលរួមពិនិត្យលើការតែងនិពន្ធរឿងអប់រំខ្លីៗ ដែលផ្សព្វផ្សាយ ក្នុងបណ្តាញសង្គមផង ព្រោះផ្នែកខ្លះនៃការផ្សព្វផ្សាយទាំងនោះ គឺខុសពីសច្ចៈភាពរបស់សង្គម ខុសការពិត ដែលធ្វើឱ្យប៉ះពាល់ដល់សង្គម។

សម្តេចតេជោ សង្កត់ធ្ងន់ថា បើសរសេរពីប្រវត្តិសាស្រ្ត អ្នកនិពន្ធត្រូវយល់ឱ្យច្បាស់ពីប្រវត្តិសាស្រ្ត និងត្រូវស្រាវជ្រាវឱ្យបានច្បាស់ កុំយកគំនិតផ្ទាល់ខ្លួនទៅបញ្ចេញ៕

សមាគមអ្នកនិពន្ធខ្មែរ – Meysansotheary

សមាគមអ្នកនិពន្ធ បើកវគ្គ “សរសេរអត្ថបទភាពយន្ត” កំណត់យកសិក្ខាកាមត្រឹម ២០នាក់

សម្តេច​តេ​ជោ ហ៊ុន សែន គាំទ្រគោលបំណង និងទិសដៅទៅអនាគតរបស់សមាគមអ្នកនិពន្ធខ្មែរ

សម្តេចតេជោ ហ៊ុន សែន គាំទ្រគោលបំណង និងទិសដៅទៅអនាគតរបស់សមាគមអ្នកនិពន្ធខ្មែរ