ធម្មតា មិនមែនយើងទំាងអស់គ្នាសុទ្ធតែអាចក្លាយជាមនុស្សជោគជ័យក្នុងជីវិតបាននោះទេ។

មូលហេតុសំខាន់គឺលទ្ធភាពរបស់យើងក្នុងការបង្កើនទំហំផលិតផល ឬអាចហៅថា តម្លៃនៃពេលវេលារបស់យើង។ខ្ញុំទទួលស្គាល់ថា តម្លៃនៃពេលវេលា អ្នកណាក៏ចេះនិយាយដែរ គ្រប់គ្នាទទួលស្គាល់ថា ពេលវេលាមានតម្លៃ ប៉ុន្តែតក្កវិជ្ជានៅក្នុងពិភពលោកនេះគឺផ្តោតលើតែលទ្ធផលប៉ុណ្ណោះ។វិធីដាក់តម្លៃពេលវេលាសម្រាប់ម្នាក់ៗ នឹងជួយឲ្យយើងអាចធ្វើការថេរវេលាតិចជាងមុន ប៉ុន្តែកម្រិតប្រាក់ចំណូលនៅដដែល ឬអាចលើសមុនផង។

វិធីនេះ ទោះបីជាមិនមានបង្កើនឲ្យយើងនូវសន្ទុះប្រាក់ចំណូលច្រើនអាចក្លាយជាសេដ្ឋីបានក៏ពិតមែន តែហោចណាស់ បន្សល់ទុកនូវពេលវេលាបន្ថែមទៀតក្នុងថ្ងៃនីមួយៗរបស់យើង សម្រាប់ទៅធ្វើកិច្ចការផ្សេងៗទៀត ដូចជា បង្កើតបានស្នាដៃថ្មីៗ។ល។យើងឃើញមនុស្សភាគច្រើនអាចឈានទៅដល់ចំណុចនេះបាន អាស្រ័យដោយសមត្ថភាព ការទទួលស្គាល់ និងស្នាដៃកន្លងមករបស់ពួកគេ។ ឧទាហរណ៍៖ គេបានឆ្លងកាត់ការលត់ដំ ធ្វើការពេញម៉ោង ៥ ទៅ ១០ ឆ្នាំ ក្រោយមកគេក៏អាចចេញទទួលយកការងារជា Freelancer ក្នុងលំដាប់ផ្សេងៗបាន ដោយមិនចាំបាច់ចំណាយពេលពេញដូចកាលពីមុនឡើយ។បច្ចុប្បន្ននេះមានការងារមួយចំនួនដែលអាចជួយយើងឲ្យបង្រួញការចំណាយពេលវេលាបាន មានដូចជា ការបង្កើតផលិតផល ឬសេវាកម្មលក់ចេញតាមអ៊ីនធឺណិត ការសរសេរសៀវភៅអេឡិចត្រូនិក និងកម្មវិធីបណ្តុះបណ្តាលនានាជាលក្ខណៈ E-Learning ដែលបោះបង់ចោលការធ្វើដំណើរទៅមករកគ្នារវាងភ្ញៀវ និងអ្នកផ្តល់សេវាកម្ម។

នេះទំនងជាហេតុផលមួយក្នុងចំណោមហេតុផលជាច្រើនដែលញ៉ាំងឲ្យទីផ្សារអនឡាញកាន់តែមានអានុភាពខ្លាំងឡើង (ខ្ញុំបានសរសេរអំពីទីផ្សារនេះ និងការប្រែសម្រួលជីវិតអ្នកប្រើប្រាស់សេវាកម្មនៅក្នុងសៀវភៅ «ទម្រាំក្លាយជាអ្នកនិពន្ធ»)។

នេះមានន័យថា ការកេងយកពេលវេលាមកទុកធ្វើអ្វីផ្សេង ត្រូវម៉ាច់នឹងការកើនឡើងនូវប្រសិទ្ធភាពទីផ្សារអនឡាញ ហើយអត្ថប្រយោជន៍គឺបានលើភាគីទំាងសងខាង។មួយវិញទៀត ចង់ក្លាយជាអ្នកដែលអាចប្រើទុនពេលវេលាបានច្រើន គឺចំណេះដឹងដែលអាចនាំទៅដល់ការប្រើប្រាស់បណ្តាមធ្យោបាយស្វ័យប្រវត្តិទំាងឡាយនៅក្នុងអាជីវកម្ម និងការងារប្រចាំថ្ងៃរបស់យើង។

អ្នកដែលនៅឆ្ងាយពីបច្ចេកវិទ្យា និងចំណេះដឹងថ្មីៗជុំវិញអ៊ីនធឺណិត ជាទូទៅគឺខូចពេលវេលាច្រើនជាងអ្នកដែលគេចេះប្រើមធ្យោបាយទំនើបថ្មីៗ។ខ្ញុំឧទាហរណ៍ដូចជា ពេលយើងប្រើប៊ូតុង Google ដូចគ្នា អ្នកណាក៏ចេះប្រើដែរ ប៉ុន្តែមធ្យោបាយ និងពាក្យគន្លឹះសម្រាប់រុករក គឺខុសគ្នា ដូច្នេះហើយ ពេលវេលាក៏ចំណាយទៅក្នុងរបៀបខុសគ្នាដែរ។
កាលណាយើងចេះប្រើប្រព័ន្ធកាន់តែច្រើនឡើង មិនថាប្រព័ន្ធទំនាក់ទំនងមនុស្ស ឬប្រព័ន្ធស្វ័យប្រវត្តិនានា យើងនឹងកាត់បន្ថយការចំណាយ មកផ្តោតលើយុទ្ធសាស្រ្តយូរអង្វែងក្នុងការកសាងទំនាក់ទំនងដែលធ្វើឱ្យអាជីព និងអាជីវកម្មរបស់យើងកាន់តែរីកចម្រើន។ទទួលស្គាល់អត់ថា យើងនៅយឺត មិនទាន់អាចស្វ័យប្រវត្តិ និងមានប្រព័ន្ធដ៏មានប្រសិទ្ធភាពនៅឡើយក្នុងបរិយាកាសការងារ ឬក្នុងដំណើរការជីវិតយើងទំាងស្រុង?

វិធីនេះស្រួលរកចម្លើយជាង។ ឧទាហរណ៍៖ សួរខ្លួនយើងជានិច្ច រម្លឹកខ្លួនឯងជានិច្ចថា តើយើងមានពេលប៉ុន្មាននាទីក្នុងមួយសប្តាហ៍សម្រាប់សម្រេចផលផ្សេងៗ? តើយើងស្តាយវាប៉ុនណា បើវារំលងទៅដោយមិនបានសម្រេចអ្វីសោះ?វិធីដាក់វិន័យដ៏សាមញ្ញនេះ គួរតែរម្លឹកឡើងវិញជារៀងរាល់ថ្ងៃ។ ការបង្កើតផែនការពេលវេលាច្បាស់លាស់ អាចជួយឲ្យយើងមិនសូវខាតបង់ដូចមុន។ ដោយសារការគិតពីពេលវេលាជានិច្ចនេះដែរ ជួនកាលក៏ជួយយើងឈានទៅផ្លាស់ប្តូរសកម្មភាពការងារ ឬកាលវិភាគឲ្យកាន់តែមានប្រសិទ្ធភាពឡើង។អ្នកចេះធ្វើកាលវិភាគការងារ ភាគច្រើនជាមនុស្សដែលមានលទ្ធផលការងារច្រើន ហើយមិនសូវមានអារម្មណ៍ធុញថប់ ឬធ្លាក់ទឹកចិត្ត ដោយសារពួកគេដឹងថា អ្វីទៅនឹងដំណើរការរលូន អ្វីទៅដែលត្រូវការការតស៊ូតំាំងពីដំបូង។ មនុស្សប្រភេទនេះតែងមានជម្រើស A និង B សម្រាប់មកចំណាយលើពេលវេលារបស់គេ បានន័យថា ពេលជម្រើសដំបូងមិនប្រកប គេមានជម្រើសផ្សេងភ្លាមៗ។

របាយការណ៍ ឬផែនការច្បាស់លាស់ ជាវិធីត្រូវ និងមានតែមួយគត់ ដើម្បីដឹងថា តើយើងកំពុងចំណាយទ្រព្យពេលវេលាត្រូវកន្លែង ឬមួយកំពុងខ្ជះខ្ជាយ។មនុស្សភាគច្រើនរវល់ណាស់ រវល់ដល់ថ្នាក់គ្មានពេលគេងគ្រប់គ្រាន់ និងហាត់ប្រាណ ប៉ុន្តែបែរជាមានពេលសម្រាប់ធ្វើរឿងមិនមានប្រយោជន៍ ដូចជា តាមដានជីវិតអ្នកដទៃ ច្រណែន និន្ទារិះគន់ឈានដល់ធ្វើសកម្មភាពព្យាបាទ។

ការប្រើពេលវេលារបៀបនេះ ជាការខ្ជះខ្ជាយដែលកំពុងកើតមានទូទាំងប្រទេស។ ប្រសិនបើមនុស្សយើងចំណាយពេលគិតអវិជ្ជមាន ឬពេលវេលាដែលលូកលាន់រឿងអ្នកដទៃទៅជាការពន្លូតសមត្ថភាព ឬរិះគន់ចំណុចអវិជ្ជមានរបស់ខ្លួនឯងឲ្យទៅជាមេរៀនកែលម្អវិញ ពេលវេលាប្រហែលជារឹតតែមានតម្លៃជាងបច្ចុប្បន្នឆ្ងាយ។

#ពេលវេលា ដោយម៉ីសន សុធារីតម្លៃ២៥០០០រៀល​

នៅក្នុងកម្មវិធីពិភាក្សាតុមូល​របស់ក្រុមMST ហ្វេនក្លឹប លើកទី​ពីរ​ដែលបានប្រារព្ធនាពាក់ដើមខែធ្នូ​ឆ្នាំ​២០១៩​កន្លងមកថ្មីៗ ម្ចាស់ហាង ក៏ជា​ប្រធាន​ជំនាន់ទីមួយ នៃ អ្នកនិពន្ធ ម៉ីសនសុធារីហ្វេនក្លឹប ហៅ​កាត់​ថា MST FCបានលើកឡើង​ដោយ​មោទនភាពថា សៀវភៅពេលវេលា​គឺជាសៀវភៅដំបូង​ដែល​ហាង​របស់កញ្ញាអាចលក់ចេញ​ដល់ទៅជាង​៦០០ក្បាលក្នុងរវាងពេលត្រឹម​២ខែ ក្នុងចំណោម​សៀវ​ភៅ​ជាង​៤០ចំណងជើង​ដែលកញ្ញាបានសាកល្បងយកមកលក់។ សៀវភៅ​ផ្សេងៗ យ៉ាង​ច្រើន​ណាស់​លក់​ចេញបានម្ភៃក្បាលនៅហាងរបស់កញ្ញា​ប៉ុន្តែសៀវភៅពេលេវេលា​មិនត្រឹមស្រួលប្រមូលលុយ​ចំណេញ​ថែមទំាង​មានការកុម្ម៉ង់មិនឈប់ឈរ ដោយសារកេរ្ត៍ឈ្មោះនៃខ្លឹមសារសៀវភៅនេះ។

កញ្ញាបន្ថែម​ថា ៖

«មិនត្រឹមផ្លាស់ប្តូរជីវិតខ្ញុំ តែ​វាក៏បាននាំខ្ញុំឱ្យមានបណ្តាញជាមួយអ្នកអាន​សៀវភៅ​នេះ​ច្រើនទៀតជាបុគ្គលល្បីៗក្នុងកម្ពុជា! ធម្មតា ហ្វេនក្លឹបមិនបានចូលរួមទិញសៀវភៅរបស់ខ្ញុំទេ ព្រោះ​ពួកគេ​បានទទួលតម្លៃយ៉ាងពិសេស​ខ្លំាង​ពីបណ្តាអ្នកបោះពុម្ពសៀវភៅ​របស់អ្នក​ស្រី​ម៉ីសនសុធារី ដូច្នេះការលក់នោះគឺ​លក់សម្រាប់អ្នកក្រៅសុទ្ធសាធ។»

MSTហ្វេនក្លឹបមាន​សមាជិកសកម្មប្រមាណជា​៣២នាក់ហើយ​មកដល់ពេលនេះ​ប៉ុន្តែ​ពួកគេ​ជឿថា ហ្វេនពិតរបស់អ្នកនិពន្ធ​និងសៀវភៅពេលវេលា​កំពុង​មានឡើងនៅគ្រប់ខេត្តក្រុងទៅហើយ។

ជារៀងរាល់ខែពួកគេ​តែងប្រារព្ធកម្មវិធីតុមូលមួយនៅហាង​witty Cafeដែលជ្រើសរសើវាគ្មិនប្រមាណ​ច្រើនបំផុត​ចំនួន​៣០នាក់មកជជែក​ដេញដោលលើសៀវភៅ​ណាមួយ​ដែលជាស្នាដៃ​នៃអ្នកនិពន្ធ​របស់ពួកគេ។ កម្មវិធីនេះ​តម្រូវបង់ប្រាក់១០០០០រៀល ហើយកំណត់​ចំនួនផង។ ទោះយ៉ាង​ណា​មនុស្ស​ប្រមាណជា​៥០នាក់បានចូលរួម​ក្នុងកម្មវិធីតុមូល នៃសៀវភៅពេលវេលា កាលពីថ្ងៃអាទិត្យ​ទី១​ខែធ្នូ​ជាមួយ​និងការ​ពេញចិត្ត​ជាខ្លាំង។

កញ្ញា ស៊ុយស្រីនិច បានអះអាងថា​នៅខែមករា​ឆ្នាំ​២០១៩ នឹងមានការជជែក​តុមូល​ដ៏សំខាន់មួយ​ទៀត​លើប្រធានបទ «តើពេជ្របណ្ឌិត សរសេររឿង​មន្តអាគម​ខ្មែរចេញមកដោយវិធីណាខ្លះ?»។

កញ្ញា​រំពឹងថា​អ្នកចូលរួមនិង​ទទួលបានចំណេះដឹង តាក់តែង​ប្រលោមលោកប្រភេទ មន្តអាគម​ក្នុង​ជំនឿខ្មែរយើងច្រើន ​តាមរយៈកិច្ចពិភាក្សានោះ។ អ្នកនិពន្ធម៉ីសន ​សុធារី បានប្រើនាមប៉ាកា ពេជ្រ​បណ្ឌិត​សម្រាប់បណ្តារឿងមន្តអាគមអូមអាម​ភ័យរន្ធត់ ដែលទទួលបានការពេញនិយមជាខ្លំាង​ដូចជា ​តាម​រយៈរឿង អាគមបរព្រៃ ផ្ទះគ្រូទាយ របៀនងងឹត និងគាថាបុរាណ។ល។

តាមព័ត៌មានពី ក្រុមតម្រា កវីពេជ្របណ្ឌិត​បានលក់សិទ្ធិទំាងស្រុងនៃប្រលោម​លោកថ្មីសន្លាង​របស់​ខ្លួន​ទៅឱ្យក្រុមនេះ ក្រោមចំណងជើងថា «សង្វៀន​ផ្លូវងងឹត»​ដែលរំពឹង​ថា នឹង​ចេញ​ជាសៀវភៅ​ពាក់​កណ្តាល​ខែក្រោយ។

ចំណែក​សៀវភៅ ពេលវេលា​ ត្រូវបានសរសេរឡើង នៅក្នុងឆ្នាំ​២០១៩ ហើយ​បោះពុម្ព​ក្នុង​ខែ​ឧសភា​ឆ្នាំ​ដដែល ចំនួន​៣ពាន់ក្បាល ដែលមានតម្លៃ​២៥០០០រៀល​និង​បម្រុង​បោះសារជាថ្មី​ក្នុងឆ្នាំ​២០២០​ជា Pocket Version ។