វគ្គ
ល្បិចពាលស៊ីពាល
នៅក្នុងបន្ទប់វីអាយភីរបស់ភោជនីយដ្ឋានមួយ Jack និងចាស្មីនកំពុងតែអង្គុយរីករាយជាមួយនឹងលទ្ធផលនៃផែនការរបស់គេ ដែលបានឈានទៅដល់វគ្គសំខាន់គឺ លីនខឹងគូខាន់។
ចាស្មីនដែលជាប្រពន្ធចុងរបស់មហាសេដ្ឋីរុស្ស៊ី ក៏ត្រូវជាម្តាយចុងរបស់គូខាន់ ពិតជាមានបង្កប់ភ្នែកច្រមុះគ្រប់ទីកន្លែង ហើយដឹងគ្រប់ជំហានដែលកើតឡើងចំពោះម្ចាស់អាណាចក្រសម្បត្តិនៃត្រកូល LoDolce។ សូម្បីតែ Jack ដែលបានចូលមករៀបការជាមួយកូនស្រីច្បងត្រកូលនេះ ក៏ជាការរៀបចំរបស់ចាស្មីនដែរ។ អ្នកស្រីម្នាក់នេះនិយាយតិចៗជាមួយដៃគូទុច្ចរិត៖
«ពេលវេលាជិតអស់ហើយ! ពីរនាក់នោះមិនអាចបណ្តោយឱ្យចុះអេតាស៊ីវិល ឬសូម្បីតែសែនព្រេនរៀបការជាមួយគ្នាដែរ!»
Jackចាំស្តាប់ លុះមកដល់ត្រង់នេះគេរាយការណ៍៖
«ព្រឹកមិញខាងស្រីលេខាដូចជារឹងមាំណាស់ មិនមានខ្លាចគូខាន់អីបន្តិចទេ!»
ស្តាប់គេនិយាយហើយ ចាស្មីនលើកកែវភេសជ្ជៈមកក្រេប Jack បន្តសើចរលាក់ស្មា ព្រោះឃើញផែនការរបស់គេបានសម្រេច នៅក្នុងការលួងលោមលីនកុលាបឱ្យស្ដាប់តាមបញ្ជារបស់ខ្លួន។
«និយាយអ៊ីចឹង យើងត្រូវឈានមកដល់វគ្គសំខាន់ហើយ!» Jackគេបញ្ជាក់ចាស្មីន។
«ត្រូវហើយ! មានតែមនុស្សស្រីដែលមនុស្សប្រុសងប់ស្រឡាញ់ប៉ុណ្ណោះ ដែលអាចធ្វើឱ្យវាអន់អានុភាពបាន!»
Jack ដែលកំពុងតាមដាន់ដោយយកចិត្តទុកដាក់ ឃើញចាស្មីនទម្លាក់សំឡេងនិយាយបន្ត៖
«អាក្មេងប្រុសនោះ វាដល់ថ្ងៃអង្សាដោយខ្លួនវា!»
«មីងចង់ឱ្យលីនកុលាបសម្លាប់គូខាន់?»
«មានអ្នកណាខ្វល់ទេ? បើវាស្លាប់ដោយដៃលេខាហារយរបស់វា មានអីមិនល្អ?»
«ឃោរឃៅពេកហើយដឹង?» Jackងាករអ៊ូតិចៗម្នាក់ឯង។
គំនិតរបស់ចាស្មីន ឱ្យម្នាក់ជាប់គុក ម្នាក់ទៀតបាត់បង់ជីវិត ជាគំនិតព្រួញមួយបាញ់បានសត្វពីរ។ ទោះបីJackសាហាវខាងពាណិជ្ជកម្ម លេងល្បិចប្រជែងជាមួយកូនប្រុសមហាសេដ្ឋី LoDolce ជានិច្ច តែគេមិនដែលគិតថា ម្តាយចុងម្នាក់នេះ ចិត្តខ្លាំងដៃដល់កម្រិតនេះឡើយ។
ស្នូរទះដៃលាន់ឡើងនៅឯមាត់ទ្វារ។
ពួកគេទម្លាក់កែវចុះយ៉ាងប្រញិបប្រញាប់ និងរៀបរយឫកពាអង្គុយឡើងវិញឱ្យសមជាអភិជនថ្លៃថ្នូរដូចដែលគេតែងតែឃើញនៅលើទស្សនាវដ្ដី។
ពេលនេះដែលត្រូវតែបើកភ្នែកធំៗគឺដោយសារអ្នកដែលបើកទ្វារចូលមកគឺជាកូនស្រីចៅហ្វាយក្រុងដ៏មានឥទ្ធិពល ឈ្មោះនាង ផ្លូរ៉ា។
ដោយមានអង្គរក្សពីរនាក់មាឌធំៗមកតាមផង កូនចៅហ្វាយក្រុងដែលតែងតែតាមចែចង់គូខាន់ អ្នកណាក៏ដឹង ពេលនេះចេញចូលយ៉ាងសេរីនៅទីនេះបង្ហាញថាអំណាចគ្រួសារគេ ម្ចាស់ភោជ្ជនីដ្ឋានមិនហ៊ានឃាត់ឡើយ។
Jack និងចាស្មីនគួរតែយល់ហើយ ថាវាគ្មានអ្វីចម្លែកនោះទេ ប្រសិនគេមានលុយនិងមានអំណាចក្នុងការទៅដល់គ្រប់កន្លែងដែលគេចង់។
នារីម្នាក់នេះ ជាមេម៉ាយមានអំណាចជាខ្លាំង នាងទើបជួយឱ្យគូខាន់ទទួលបានដីសម្បទានមួយកន្លែងដ៏ពិសេសដែលអ្នកអចលនទ្រព្យគ្រប់គ្នាស្រក់ទឹកមាត់ចង់បាន។
«តាមមើលខ្ញុំដល់ពេលទៅវិញហើយ!» ចាស្មីននិយាយទាំងស្ទុះក្រោកប្រុងចាកចេញចោលការអាម៉ាស់នៃសន្ទនាលួចលាក់នេះ ព្រោះភ័យរឿងប្តីខ្លួនមានទំនាក់ទំនងល្អជាមួយចៅហ្វាយក្រុង ខ្លាចនាងផ្លូរ៉ាផ្សាយចេញនូវបទឃុបឃិតនានារបស់ខ្លួនជាមួយអ្នកក្រៅប្រឆាំងនឹងកូនដើម ឮដល់ត្រចៀកប្តី។
«ប្រញាប់ម្ល៉េះ? ខ្លាចប្ដីដឹងពុតបាត់បង់តំណែងជាប្រពន្ធចុងល្អឬក៏យ៉ាងម៉េច?»
ថាហើយ ហ្លរ៉ាអង្គុយលើកៅអីដែលអង្គរក្សទាញឱ្យ។
ចាស្មីនសឹងថប់ដង្ហើមតែទប់ចិត្តគិតមកវិញថា បើនឹងសិនចាកចេញទៅទាំងអ៊ីចឹង ក៏មិនអាចដោះស្រាយស្ថានការណ៍អីបានដែរ បើសិនជាផ្លូរ៉ាចង់មករករឿងទៅហើយ។
«អូខេ! នៅទៀតក៏បាន! មិនដឹងថា ដែលនាងធំប្រាថ្នាចង់ឱ្យមីងនៅស្តាប់ មានកិច្ចសហការអីសំខាន់ធ្វើជាមួយគ្នាបានទេ ឬមួយក៏ចង់ឱ្យមីងជួយជំរុញអាពាហ៍ពិពាហ៍នៅផ្ទះ LoDolce ឱ្យបានសម្រេចឆាប់?
Jackឃើញសភាពការណ៍វិវត្តទៅជាបែបនេះ ក៏ប្រញាប់ប្រញាល់សម្រួលខ្លួនក្រោកទៅងើបទាញកៅអីទទួលFloraដែរយ៉ាងគួរសម។
«ប្រសិនជាអ្នកនាងចង់ជជែកកម្សាន្ដជជែកពីបញ្ហាសំខាន់គួរតែមានគ្នាបីនាក់បានហើយ!»
ផ្លូរ៉ាដៀងភ្នែកឱ្យសញ្ញាកងអង្គរក្សដឹងខ្លួនចាកចេញទាំងពីរហើយរុញបិទទ្វារឱ្យមកវិញផង។
តាមមើលប្រហែលជាចាស្មីនមានលក្ខខណ្ឌល្អដែលនិយាយរឿងរៀបការមកចងចិត្ត Floraដ៏ឆ្លាតវៃ។ នាងស្រីចោលកែវភ្នែករិះគិត សម្លឹងមកទាំងJackសម្លឹងទាំងចាស្មីន នារីវ័យកណ្តាលស្រស់ស៊ិចស៊ីម្នាក់ពោរពេញទៅដោយពុតត្បុតនៅក្នុងស្រោមជាអភិជននិងជាសំណព្វនៃឪពុកគូខាន់។
«ខ្ញុំព្រមស្តាប់សិនថា មីងចាស្មីនមានគំនិតជួយជំរុញអាពាហ៍ពិពាហ៍បែបណា?»
នារីកូនចៅហ្វាយក្រុងនិយាយស្តីចំៗណាស់ និងមិនខ្លាចអ្នកណារិះគន់ថាខ្លួនឯងចង់បានគូខាន់ពេញបន្ទុកទេ។ ដែលនាងនិយាយយ៉ាងចង់បាន ថែមទាំងវាយភ្នែកទៅកាន់Jackផងបានន័យថា ផ្លូរ៉ាមិនខ្វល់ខ្មាស មិនរវល់ថា ពីរនាក់នេះត្រូវការគ្នាយ៉ាងណាទេ នាងមកនេះ ពិតជាមានសេណារីយ៉ូធំមួយ ចំណែករឿងគូខាន់ជាចំណុចបណ្តូលនៃសេណារីយ៉ូនោះ។
«មីងចាំស្តាប់ក្មួយផ្លូរ៉ាមុន!» ចាស្មីនដាក់កាយធ្វើតាមចាស្មីនបញ្ជា។
«ត្រូវហើយ! សូមប្រាប់មកចង់ឱ្យពួកយើងធ្វើអ្វីបាទ! គឺសហការរីករាយ!»
«បបួលខ្ញុំឱ្យសប្បាយចិត្តពិតមែននៀក!» ផ្លូរ៉ាសើចក្អឹកៗយ៉ាងមានមោទនភាពនឹងអំណាចរបស់ខ្លួន។ ឃើញពួកគេនៅរង់ចាំស្តាប់ កូនស្រីស៊ីវិល័យរបស់ចៅហ្វាយក្រុងលែងសើច ប្តូរទឹកមុខមកជាម៉ឺងម៉ាត់៖
«ដែលអ្នកទាំងពីរកំពុងធ្វើអ្វី និងជំហានបន្ទាប់ចាត់ការលីនកុលាបយ៉ាងណាទៀតខ្ញុំមិនខ្វល់ទេ! មិនថាស្រីម្នាក់ហ្នឹង នៅក្នុងគុកឬមួយក៏យ៉ាងម៉េច ធ្លាក់ស្លាប់ ខ្ញុំសប្បាយចិត្តទាំងអស់! ហើយ…ប្រហែលជាអាចអាចអរគុណអ្នកទាំងពីរជាប្រាក់រង្វាន់ខ្លះ!»
Jackបង្ហាញអាការៈសប្បាយចិត្ត ជាការអង្គុយត្រង់ខ្លួនទាញអាវធ្វើដូចជាសុភាពបុរសហើយដៀងភ្នែកសម្លឹងមុខកូនស្រីចៅហ្វាយក្រុងនារីម្នាក់នេះ ដោយពេញចិត្តដែលនាងមានអំណាច និងចង់ឱ្យនាងមកជួយរុញច្រានអាជីវកម្មគេខ្លាំងណាស់។
ករណីពិត គឺបើសិនជាផ្លូរ៉ាហានិយាយតែមួយម៉ាត់ គម្រោងសម្បទានដែលហៀបនឹងបានដល់គូខាន់ នឹងអាចក្លាយមកជាសម្រាប់Jackវិញផងក៏ថាបាន។
អ្វីៗដែលមិនទាន់សម្រេច សុទ្ធតែអាចផ្លាស់ប្តូរបាន។
«ចំណែកគូខាន់ គេជាអនាគតប្តីរបស់ខ្ញុំ អ្នកណាចង់សម្លាប់គេអ្នកនោះរឿងជាមួយខ្ញុំ!»
ពេលនាងវាត់ត្រលប់មកកាន់គេភ្លាមៗ ដូច្នេះចាស្មីននិងJack ទុកថាផ្លូរ៉ាបានលបទាន់ និងថែមស្តាប់ឮពីល្បិចរបស់អ្នកទាំងពីរនៅមាត់ទ្វារនេះរួចទៅហើយ។ ប្រសិនគម្រោងការនេះត្រូវផ្លូរ៉ាខឹងនិងធ្វើឱ្យខ្ចាយដល់ត្រចៀកគូខាន់ឬឪពុកគេ ចាស្មីននិងJackអាចមានរឿងធំ។
ទោះយ៉ាងណា Jackគេនៅធ្វើពើនិយាយបន្ត៖
«ខ្ញុំមានថាសម្លាប់ឯណា ខ្ញុំស្តាប់សេណារីយ៉ូអ្នកនាងធំ!»
ផ្លូរ៉ាញាក់ស្មាអំនួត៖
«អ្នកទាំងពីរដឹងហើយថា គេនឹងក្លាយជាអនាគតស្វាមីរបស់ខ្ញុំ!»
Jack ងាកមុខចេញតិចៗរកល្បិចមកដោះសារកំហុស ណាមួយរៀបឫកមិនហ៊ានធ្វើប្រតិកម្មណាមួយ ឱ្យផ្លូរ៉ាអន់ចិត្តទេ ប៉ុន្តែក្នុងចិត្តលបនឹកពេបជ្រាយសន្តានកូនស្រីអភិជនដែលពិតជាឃ្លានចង់ស្រលាញ់មនុស្សប្រុសស៊ិចស៊ីរោគចិត្តម្នាក់ដល់ថ្នាក់នេះ។
នាងមានអាយុច្រើនជាងគូខាន់ មានទម្រង់រស់នៅដូចមនុស្សប្រុស ហ៊ានស៊ីហ៊ានសង ហើយជាស្រីមេម៉ាយទៀត គូបដិបក្ខម្នាក់នេះ ខ្លាំងរហូតដល់Jackត្រូវស្រងល់និងថយគិតហ្មត់ចត់។
«ខ្ញុំក៏ជឿថា លោកមិនមែនចង់សម្លាប់គូខាន់ដែរ លោកគ្រាន់តែចង់បានដីសម្បទាននោះ!»
ចំចំណុចចិត្តពេក គេងក់ក្បាលយ៉ាងញាប់៖
«អ្នកនាងផ្លូរ៉ាពិតជាឈ្លាសវៃខ្លាំងណាស់! គូខាន់នេះសំណាងហើយដែលមានអ្នកនាង!»
ចាស្មីនក្រពាត់ដៃធ្វើមុខស្មើ។
ផ្លូរ៉ាដឹងចិត្តយាយប្រពន្ធចុងថា សេណារីយ៉ូឱ្យគូខាន់នៅរស់ មិនបានធ្វើឱ្យយាយចាស្មីនសប្បាយចិត្តទេ។ បើខ្លួនមិនមានលក្ខខណ្ឌល្អដល់គាត់ ក៏មិនកើត។ នាងងាកមកលួងលោមចំៗ៖
«អ៊ីចឹងយើងនិយាយគ្នាចំៗ លក្ខខណ្ឌខ្ញុំចង់បានគូខាន់ដោយលីនកុលាបនឹងរលាយទៅ! អ្នកទាំងពីរជាអ្នកធ្វើ ហើយដីនោះបានមកលើលោកJack!»
ផ្លូរ៉ាបង្អន់ ចំណែកJackអរបិទមាត់មិនជិត កន្ទុយភ្នែកយឺតៗបង្វែរសម្លឹងទៅម្តាយចុងរបស់គូខាន់ ខ្លាចតែស្រ្តីនោះមិនព្រម ដែលគាត់មិនបានដូចបំណង។
ផ្លូរ៉ានិយាយកាត់ការសង្ស័យរបស់Jack៖
«ឱ្យតែខ្ញុំចូលដល់ផ្ទះនោះ ខ្ញុំជាគ្នារបស់មីង!»
ចាស្មីនដៀងភ្នែកគិត លក្ខខណ្ឌនេះពិតជាល្អប្រសើរណាស់ ដ្បិតតែខ្លួនមិនចូលចិត្តគូខាន់និងម្តាយគេ ដែលទទួលបានអ្វីអ្វីគ្រប់យ៉ាងនៅក្នុងអាណាចក្ររបស់មហាសេដ្ឋី Doloce ប៉ុន្តែពេលនេះពិតជាមានជម្រើសល្អដាក់មកលើតុឱ្យជ្រើស។
គាត់និយាយតិចៗ៖
«អ្នកនាងពូកែកំប្លែងណាស់! បើលោនឹងរៀបការជាប្រពន្ធគេ មកធ្វើគ្នារបស់ខ្ញុំយ៉ាងម៉េចទៅ? ធម្មតាប្រពន្ធតែងតែចង់ឱ្យប្ដីបានអ្វីៗគ្រប់បែបយ៉ាង! បើសហការគ្នាមែនគួរនិយាយគ្នាឱ្យរួចរាល់ ថាពេលនោះខ្ញុំបានអ្វីខ្លះ? គួរតែមានលក្ខណៈច្បាស់លាស់ជាងនេះបន្តិចទៅ!»
«អ៊ីចឹង មីងចង់បានអ្វី?»
ចាស្មីនមិនមាត់មិនក។ អ្នកណាមិនចង់បានអាណាចក្រ Doloce?
ផ្លូរ៉ាសើច ហើយនិយាយបន្តព្រោះម្ចាស់នៃសំណួរមិនឃើញមានអ្នកហើបមាត់ឆ្លើយ៖
«មីងស្មានថា កូនស្រីមីងវ័យប៉ុណ្ណឹង អាចមកកាន់កាប់ Doloce ដូចគូខាន់បាន? ណាមួយ មីងស្មានថា ប្រើលីនកូលាបទៅសម្លាប់គូខាន់របស់ខ្ញុំបានងាយណាស់? ប្រុសម្នាក់នោះ គេមិនល្ងង់ខ្លៅដល់ថ្នាក់នេះនោះទេមីងចាស្មីន! ថាមិនបាន ពេលនេះគេកំពុងតែសម្លាប់ ឬមួយក៏ច្របាច់កនាងតូចល្អិតនោះហើយក៏មិនដឹង? មីងគួរស្គាល់កូនដើមមីងឱ្យច្បាស់!»
«អ៊ីចឹងអ្នកនាងឱ្យខ្ញុំធ្វើម៉េច?»
«ធ្វើតាមគ្រប់អ្វីខ្ញុំបញ្ជា!»
«ខ្ញុំនៅតែសួរ! ចុងក្រោយនៃល្បែងនេះ ខ្ញុំនឹងបានអ្វី?»
«ខ្ញុំការពារមីងពីម្តាយរបស់គេ! ទោះជាខ្ញុំក្លាយជាប្រពន្ធរបស់គេ តែខ្ញុំនឹងឈរខាងវិញ បានទេប៉ុណ្ណឹង!»
ចាស្មីននៅស្ងៀម Jackវិញដែលសប្បាយចិត្តជាខ្លាំងរឿងដីសម្បទានអភិវឌ្ឍមកដល់លើថាសនោះ ពេលនេះហាក់ចង់ដោះដៃចោលចាស្មីនឱ្យនៅហេងហាងកណ្តាលមហាសាគរ។
«ចុះបើសិនជានាងដូរសម្ដី ហើយមិនការពារខ្ញុំពីម៉ែកូនគូខាន់នៅក្រោយពេលនាងរៀបការរួច?»ចាស្មីនសួរដោយមុខស្មើ។
«មីងគ្មានជម្រើសទេ! មីងត្រូវការខ្ញុំ ហើយត្រូវតែជឿលើខ្ញុំ!»
ចាស្មីនទម្លាក់ភ្នែកទោមនស្ស។
ផ្លូរ៉ានិយាយបន្ត៖
«ខ្ញុំដឹងថា មីងជាអ្នកធ្វើឱ្យហាសិកាលោតសម្លាប់ខ្លួន!»
ចាស្មីនបើកត្របកភ្នែកឡើងមកវិញព្រោះមិននឹកស្មានថា ល្បិចគ្រប់យ៉ាងរបស់គាត់ត្រូវ Record បាននៅក្នុងដៃនារីម្នាក់នេះទាល់តែសោះ។
ដោយញ័រមាត់ គាត់ពោល៖
«ខ្ញុំមិនយល់អ្វីដែលនាងនិយាយនោះទេ!»
ផ្លូរ៉ាញញឹម ហើយវាចាមួយៗ៖
«នឹកស្មានថារឿងដែលកូនអុកអ្នកមានៗរបស់មីង យកលុយលួងហាសិការហូតបានខ្លួនប្រាណក្មេងស្រីនិងបញ្ឈឺ ព្រមាន blackmail រហូតដល់ក្មេងស្រីលោកសម្លាប់ខ្លួន ស្មានថាលាក់ជិត? មីងចង់ទម្លាក់លើគូខាន់? មី គិតថា ធ្វើបានសម្រេចដោយលាងស្អាតមែនទេ? នៅមានលោកទៀតJack សូម្បីតែខ្លួនឯងវេរលុយទៅជួបជាមួយបងស្រីគេដោយខ្ចីដៃអតីតលេខាសំអុយឈ្មោះនាងអេលីនោះនៅប្រទេសថៃ ស្មានថាខ្ញុំគ្មានភស្តុតាង? នេះ Jack!»
ពួកគេនៅស្ងៀមសម្លឹង flash File ដែល floraដាក់មកលើតុនៅនឹងមុខចាស្មីន។ ដោយយល់ថាកូនស្រីចៅហ្វាយក្រុងមានអ្វីៗគ្រប់យ៉ាងក្នុងដៃហើយ ទាំងJack និងស្ត្រីម្តាយចុងក៏បិទមាត់ដូចគេចុក។
នៅខាងណេះវិញ លីនដ៏ស្រងូតកំពុងឆែកឆេអាផាតមិនរបស់គូខាន់។ ទីនេះជាទីស្នាមស្នេហ៍របស់នាង នាងគួរនឹកគេ ប្រចណ្ឌគេ តែចិត្តខឹងរឿងហាសិកាខ្លាំងបានជាលីនងងឹតមុខ។
ប្រសិនគេពិតជាមានអតីតកាលជាមួយប្អូនស្រីនាងមែន សូម្បីម្តងក៏លីនកុលាបមិនអធ្យាស្រ័យឱ្យដែរ។
ទោះយ៉ាងណា ឆែកអីក៏មិនឃើញ ស្រីអង្គុយសំកុកលើពូករបស់គេ។
លីនមិនដឹងថា ផ្ទះនេះមានបង្កប់កាមេរ៉ាក្នុងទូរសព្ទដៃគេទេ។ ស្រីលេខា អង្គុយគិតចុះឡើងនឹកក្នុងចិត្តថា ប្រសិនបើរកមិនឃើញពេលនៅឆ្ងាយពីគេគួរតែនៅក្បែរគេវិញក្រែងមានតម្រុយ។
ស្រីទីរទើររួចក្រោកដើរចេញមកក្រៅនិងលើកទូរសព្ទខលទៅរកគេ។
សំឡេងរោទ៍….លាន់នៅក្រៅ…គឺនៅមាត់ទ្វារចូលមក។
គេមកដល់ពីពេលណា គេនៅឈររង់ចាំមើលនាងដែលរុករើបន្ទប់គេងគេ? ស្រីទម្លាក់ទឹកមុខទៅជាស្លេកសម្លឹងគូខាន់។ ដៃលីនក្តោបហ្វូន ខណៈសំណើចតូចមួយបានផ្ទុះចេញពីទ្រូងរបស់គេ ហើយគេចុចហ្វូនគេបិទ។
នាងឈរធ្មឹង…
គូខាន់ បានដើរទើមៗសំដៅមក។
នាងកំពុងគិតថា បើនាងចង់ឱ្យគេមកក្បែរដើម្បីស៊ើប ពេលនេះគេមកដល់ហើយ មករហ័សជាងការគិត គឺរហ័សដល់ថ្នាក់ថា នាងមិនដឹងត្រូវដោះសារ ឬប្រើឫកពារអ្វីរំងាប់គេមិនឱ្យសង្ស័យនាង។
គេមកដល់ទល់នឹងខ្លួនលីន ជាពេលដែលរាងកាយរបស់មនុស្សពីរនាក់ឃ្លាតគ្នាយូរថ្ងៃ ឥឡូវនេះនៅជាប់នឹងគ្នា។
លេខាបានក្រឡេកមើលទៅមុខគេ ខណៈប្រុសស្អាតសម្លឹងមកនាងដោយសើចៗ។
ស្រីខំរុញគេចេញម្ដង នៅមិនរបើក រុញទៀតលើកនេះគូខាន់ក៏ព្រមថយចេញបន្តិច ប៉ុន្តែនៅតែចោមរោមកន្លែងដែលលីនឈរ។
ដៃគេច្បាមចាប់នាងមកទល់នឹងទ្វារបន្ទប់ ឱ្យប្រឈមជាមួយនឹងរាងកាយធំខ្ពស់របស់គេ។
យល់យ៉ាងណាដែរចំពោះសាច់រឿងខាងលើ