ប្រលោមលោក ស្រលាញ់បងជ្រៅជាងសមុទ្រ – Meysansotheary

ឱកាសពិសេស Review រឿង “ស្រលាញ់បងជ្រៅជាងសមុទ្រ” ឥលូវនេះ នឹងទទួលបាន “អធិរាជបេះដូង” មួយក្បាលភ្លាមៗ

srey leak — Thu, 14 Sep 2023 12:41:12 +0000

សម្រាប់មិត្តអ្នកអានដែលជាអ្នកស្នេហាប្រលោមរបស់អ្នកនិពន្ធ ម៉ីសន សុធារី ពេលនេះអ្នកនឹងទទួលបានឱកាសពិសេស ដោយទទួលបានសៀវភៅមួយក្បាលក្រោមចំណងជើងថា អធិរាជបេះដូង ភ្លាមៗ ខណៈដែលអ្នក Review រឿង “ស្រលាញ់បងជ្រៅជាងសមុទ្រ ។

កាដូដ៏ពិសេសមួយនេះផងដែរ នឹងបានទៅដល់លោកអ្នកប្រសិនបើអ្នកបាន Review រឿង ស្រលាញ់បងជ្រៅជាងសមុទ្រ ស្របទៅតាមលក្ខខណ្ឌរបស់ក្រុមការងារ meysansotheary ។ ដោយក្នុងនោះក្រុមការងារបានដាក់នៅលក្ខខណ្ឌពិសេសមួយដោយតម្រូវឱ្យអ្នកអានផ្ញើរការ Review មកកាន់ប្រអប់សាហ្វេសបុក ហើយនឹងទទួលបានការដាក់ពិន្ទុពីក្រុមការងារយើងខ្ញុំ។

ទោះយ៉ាងណាក៏ដោយ សម្រាប់លក្ខខណ្ឌផ្សេងៗនឹងត្រូវបានអនុវត្ត ឬត្រូវបានផ្លាស់ប្ដូរភ្លាមៗដោយមិនអាចប្រាប់ទុកមុន។ សម្រាប់អ្នកដែល Review មុនគេនឹងទទួលបានការវាយតម្លៃពីក្រុមការងារភ្លាមៗផងដែរ៕

សូមប្រញាប់រួសរាន់ឡើងឱកាសមានកំណត់!

កញ្ញា គ្រាប់ជី

អ្នកនិពន្ធនិយាយបែបណា ក្រោយរឿង «ស្រលាញ់បងជ្រៅជាងសមុទ្រ» ឈានដល់ភាគបញ្ចប់យប់មិញ

srey leak — Thu, 17 Aug 2023 12:10:00 +0000

សាច់រឿងដ៏ក្ដៅគគុក ដែលពោរពេញដោយភាពតានតឹងនៃឧក្រិដ្ឋកម្មពិភពលោក ភាពប្រទូសរ៉ាយរវាងប៉ូលិសនិងមនុស្សក្រៅច្បាប់ រួមទាំងឈុតឆាក មនោសញ្ចេតនាជ្រាលជ្រៅដល់ប្រអប់បេះដូង រឿងស្រលាញ់បងជ្រៅជាងសមុទ្រ បានឈានដល់ភាគបញ្ចប់កាលពីយប់មិញនេះ។

អ្នកស្រី ម៉ីសន សុធារី

ជាមួយប្រលោមលោកដ៏វែងអន្លាយជាង ១១០០ទំព័រ អ្នកនិពន្ធលើកឡើងថា បានសរសេរជារៀងរាល់ថ្ងៃ ដើម្បីផ្គាប់ចិត្តអ្នកអានដែលជក់អារម្មណ៍តាមដាន និងទាមទារភាគបន្តជារៀងរាល់ថ្ងៃ។

នៅក្នុងបទពិសោធន៍នៃការងារលំបាកមួយនេះ អ្នកស្រី ម៉ីសន សុធារី អះអាងថា បានសិក្សាអ្វីថ្មីជាច្រើន រវាងអារម្មណ៍អ្នកអាននិងប្រលោមលោក។ នៅពេលកំពុងសរសេរបណ្ដើរចេញផ្សាយបណ្ដើរ អ្នកនិពន្ធយល់ថា ជីវិតឬសភាពដែលតួអង្គកំពុងជួបប្រទះក្នុងសាច់រឿង មានឥទ្ធិពលជាខ្លាំងលើអ្នកអានរបស់ពួកគេ។

អ្នកស្រីបញ្ជាក់បែបនេះថា «ខ្ញុំជាអ្នកនិពន្ធ ទទួលបាននូវអារម្មណ៍រ៉ូមែនទិក ជក់ចិត្ត លន្លង់លន្លោច ទទួលអារម្មណ៍សប្បាយនិងទុក្ខព្រួយផ្ទាល់ជាមួយតួអង្គក្នុងរឿង ដូច្នេះ អ្នកអានក៏ប៉ះអារម្មណ៍នេះដូចគ្នា នេះជាមូលហេតុពួកគេជក់ចិត្ត។ អក្សររបស់យើងនឹងក្លាយជារូបភាព អ្នកអានបានឮសំឡេងតួអង្គនិយាយ ហើយបានដក់គិតអំពីពួកគេ ទម្រាំពេលវេលាផ្សាយចូលមកដល់គឺនៅម៉ោង៨យប់។ រយៈពេលជាងមួយឆ្នាំ ប្រលោមលោកដែលមានចំនួន៩៩ភាគ ផ្សាយផ្ទាល់អនឡាញលើ MEYSANSOTHEARY.COM តែងតែងនៅលើកំពូលតារាងនៃការចូលអានហើយ ភាពរំជើបរំជួលបានត្រូវលាតត្រដាងក្នុងសហគមន៍មិត្តអ្នកអាន! ខ្ញុំបានសិក្សាពីទម្រង់នៃនិទានមនោសញ្ចេតនាថ្លៃថ្នូររាបសា ដូចជាការប្រកួតបានជោគជ័យជាក់ច្បាស់ លើពពួករឿងឈុតឆាកសិចស៊ីរោលរាល។ ប្រលោមលោកបែបនេះ មិនអន្ទះអន្ទែងតែកក់ក្តៅ!»។

អ្នកស្រីបញ្ជាក់ទៀតថា ខណៈពេលដែលប្រលោមលោកយុវជនមួយចំនួនផ្សេង បានជោគជ័យដោយត្រូវភ្ជាប់ ជាមួយនឹងការរួមភេទ ហើយការរំញោចតណ្ហាបានក្លាយជាធ្នាក់សំខាន់ រួមជាមួយការបំពក់នូវ កិត្តិនាម មាសប្រាក់ វត្ថុសិរី ភាពរុងរឿង និងអំណាច អ្វីៗដែលយើងមាននៅក្នុងប្រលោមលោករបស់ខ្ញុំ ភាគច្រើនជាទស្សនវិជ្ជារបស់មនុស្សដែលមានតម្លៃលើសអំពីវត្ថុទាំងពួងនៃតណ្ហា។

តួអង្គរបស់យើង បានបង្ហាញ ស្នេហាគឺអត់ធ្មត់ ឯសេចក្ដីស្រឡាញ់គឺជាអំពើសប្បុរស ជាការផ្តល់មិនមែនទាមទារទេ។ យូស៊ូច្រណែន បានន័យថាមិនស្រលាញ់នាងទេ គេចង់មាននាងមកគ្រាន់តែជាការអួតអាង ជាមោទនភាពហើយអគតិទាំងនោះបានធ្វើឱ្យនីយ៉ាររបស់យើង មិនមែនជាមនុស្សស្រីមានសុភមង្គល តែជាឈ្លើយ ឬជាជនរងគ្រោះ។ ជាមួយឥន្ត្រាវិញ ស្នេហាតែងតែជាគ្រឿងការពារ ជឿជាក់ ផ្ដល់សង្ឃឹម និងបង្កើតស្មារតីតស៊ូជានិច្ច។ ស្នេហាស្មោះមិនដែលបរាជ័យទេ ប្រសិនអ្នកណាចេះស្រលាញ់ស្មោះដូចឥន្ត្រា។

នៅក្នុងបទនិពន្ធបែបមនោសញ្ចេតនា អ្នកនិពន្ធ ម៉ីសន សុធារី ចូលចិត្តបង្កើតការពិពណ៌នានៃសេចក្ដីស្រឡាញ់ដោយពន្យល់ថា តណ្ហាគឺអំពីការទទួលបាននូវអ្វីដែលយើងចង់បាន រីឯសេចក្ដីស្រឡាញ់គឺការដែលចង់ឃើញអ្នកដទៃក្លាយជាមនុស្សល្អ រស់នៅបានល្អ បានន័យថា សេចក្ដីស្រឡាញ់របស់គាត់ផ្តោតលើការបង្កើតក្តីសុខដល់អ្នកផ្សេងទៀត។ ពីដំបូងនីយ៉ា ស្រលាញ់យូស៊ូព្រោះភាពឡូយឆាយ ស្រើបស្រាល ភ្លើតភ្លើន តែនៅពេលឥន្ត្រាដែលមានភាពចាស់ទុំ និងមានសមានចិត្តស្នេហាដ៏ជ្រាលជ្រៅ នីយ៉ាផ្ដើមរេចេញពីវត្ថុបំណងនៃស្នេហាយុវវ័យដំបូងរបស់នាងដែលងប់ងុលនឹងភាពស្រស់ស្អាតពោរពេញទៅដោយតណ្ហាចិត្ត មកជាលះបង់គ្រប់យ៉ាងសម្រាប់មនុស្សដែលគ្មានអនាគតដូចជាឥន្ត្រា។ មិនថា មនុស្សក្លូនអាចរស់បានដល់ថ្ងៃស្អែកឬអត់ នារីនេះចង់ឈរនៅក្នុងស្រមោលរបស់គេ បញ្ជូននូវសេចក្ដីស្រឡាញ់ដ៏ជ្រាលជ្រៅទៅឱ្យគេ។

ធ្លាប់នឹកអារម្មណ៍រ៉ូមែនទិកទេមួយរយៈស្តេ្រសនេះ ? តើការអានសៀវភៅល្អ អាចទាក់ទាញអារម្មណ៍វិជ្ជមានបែបណាខ្លះ? កុំភ្លេចស្រលាញ់បងជ្រៅជាងសមុទ្រ មានទាំងអានអនឡាញ មានទាំងសៀវភៅបោះពុម្ព៕

ចុចអាន៖អ្នកនិពន្ធសារភាពថា មានភាពលំបាកក្នុងការបញ្ចប់រឿង “ស្រលាញ់បងជ្រៅជាងសមុទ្រ” វគ្គ៣ ខណៈហ្វេនរងចាំយ៉ាងអន្ទះសា

កក់ឬនៅ? ប្រលោមលោក “ស្រលាញ់បងជ្រៅជាងសមុទ្រ” ភាគ ២ កាន់តែលេចអាថ៌កំបាំងធំជាងមុន

srey leak — Sat, 10 Jun 2023 12:05:00 +0000

ភាគនិនានស្នេហារវាងកូនម្ចាស់កោះ H និងកូនពៅប៉ូលិសត្រៀមចេញផ្សាយជាសៀវភៅនាពេលខាងមុខហើយ បន្ទាប់ពីការរំអុកពីបណ្ដាអ្នកគាំទ្រជាច្រើន ជាពិសេសអ្នកស្នេហាវិស័យប្រលោមលោកមនោសញ្ចេតនា។

យ៉ាងណាមិញប្រលោមលោក “ស្រលាញ់បងជ្រៅជាងសមុទ្រ” កាលពីភាគ១ធ្លាប់អង្រួនបេះដូងអ្នកអានឲ្យកាន់តែចង់ដឹងពីមួយវគ្គទៅមួយវគ្គ បន្ទាប់ពីអ្នកនិពន្ធបានបង្ហាញតួអង្គប្រុសឥន្រ្តាជាមនុស្សត្រជាក់ ស្ងប់ស្ងាត់ តែមើលទៅគ្រោះថ្នាក់។ គេត្របុតត្របុយ និងមានការគិតដ៏ឃោរឃៅ ដាច់ខាត។ មើលប៉ុន្មានភាគដំបូងទៅដូចជា សត្វសាហាវ ខ្លាឬក៏ចចកដែរ គេសប្បាយរីករាយនៅពេលចាប់បានសត្រូវ ប៉ុន្តែរឿងដែលយើងអាចធ្វើឲ្យអ្នកអានភ្ញាក់ផ្អើលមិននឹកស្មានដល់ គឺសន្សឹមៗពីមួយភាគទៅមួយភាគ បានរកឃើញអ្វីៗផ្សេងៗបន្ថែមនៅក្នុងជម្រៅចិត្តដ៏អាថ៌កំបាំង បេះដូងរបស់គេ ។ គេជាមនុស្សពិតប្រាកដ មិនមែនជាសត្វហើយគេមានបេះដូងឯកោមួយ។ គេតែងដើរតួនាទីជាកូនច្បងដែលការពារនិងកតញ្ញូ ប៉ុន្តែគេមិនដែលមានអារម្មណ៍ស្រលាញ់និងលះបង់ចំពោះសភាវទន់ភ្លន់នៃបេះដូងមនុស្សស្រីទេ។

ទោះយ៉ាងណាក៏ដោយ កាលពីភាគមួយអ្នកអានភាគច្រើនគិតថានីយ៉ានឹងអាចលង់ស្រលាញ់ឥន្រ្តា។ ប៉ុន្តែមិនដូច្នោះទេ នាងមានស្នេហាជ្រាលជ្រៅចំពោះតែយូស៊ូ នាងសុខចិត្តលះបង់ជីវិតដើម្បីតែកូនពៅម្ចាស់កោះHវិញ។ ដែលនេះបានធ្វើឲ្យអ្នកអានគ្រប់ៗគ្នាហាក់មានចំងល់រវាងប្អូនប្រុសនិងបងប្រុស តើនីយ៉ានឹងទទួកយកអ្នកណាមកថែរបេះដូងតូចតន់។

ត្បិតថានីយ៉ាមានស្នេហាលើសលប់ឥតគណនាចំពោះយូស៊ូក៏ពិតមែន ប៉ុន្តែស្នេហានេះគ្រាន់តែជាក្ដីស្រលាញ់រវាងគ្នាមិនមែនស្និតកាយដូចឥន្រ្តាឡើយ។ ដូច្នោះត្រង់ឈុតនេះពិបាកឲ្យអ្នកអានបែងចែកណាស់ រវាងបងប្អូនពីរនាក់នេះ។ ជាពិសេសតើស្នេហារបស់យូស៊ូនិងនីយ៉ាទៅមុខរបៀបណា បើសិនការពិតត្រូវបង្ហាញថាយូស៊ូជាកូនប្រុសបង្កើតរបស់លោកម៉ឺនយូ ដែលជាមុខសញ្ញាធំរបស់ប៉ូលិស។

លើសពីនេះទៀត រវាងឥន្ទ្រា-យូស៊ូ ម្នាក់ណាជាម្ចាស់បេះដូងពិតប្រាកដ ខណៈនាងពីចំណាប់ខ្មាំងមកជាកូនអុកនយោបាយរវាងឪពុករបស់គេនិងបងប្រុសរបស់នាងដែលជាមេប៉ូលិសជេន។ អ្នកអានមានតែរង់ចាំតាមដានភាគទី២ ដែលនឹងត្រូវបោះពុម្ភជាសៀវភៅឆាប់ៗនេះ និងមានចេញផ្សាយលើវេបសាយ meysansotheary.com ផងដែរ។

គួររំឭកផងដែរថា ប្រលោមលោកថ្មីរឿង ស្រឡាញ់បងជ្រៅជាងសមុទ្រនេះ គឺជាសាច់រឿងដែលនិពន្ធផ្ទាល់ដោយអ្នកនិពន្ធឡើង ដោយ អ្នកស្រី ម៉ីសន សុធារី ហើយហ្វេនក្លឹបសង្ឃឹមថា រឿងនេះនឹងនាំមកនូវកេរ្តិ៍ឈ្មោះល្បីល្បាញបន្ថែមលើសពីរឿងមុនៗ ដែលបានត្រូវបានគេចាត់ទុកថាជាប្រលោមលោកមានអ្នកអានច្រើនដង ស្រទន់មន្តស្នេហ៍ និងរឿង ថ្ងៃមុនស្អប់ថ្ងៃនេះស្រលាញ់។

ចំពោះមិត្តអ្នកអាន បើសិនអ្នកជានីយ៉ា តើនឹងត្រូវធ្វើយ៉ាងណាបើដឹងការពិតថាមនុស្សដែលយើងបានលះបង់ជីវិតជូនគេ គឺជាកូនប្រុសបង្កើតរបស់សត្រូវបងប្រុសខ្លួន? តើប៉ូលិសជេន នឹងរកឃើញការពិតអ្វីខ្លះរវាងពិសិទ្ធដែលបាត់ខ្លួននិងឥន្រ្តាទាជាកូនច្បងកោះ H ។ តោះ កុំគិតយូរ កក់លឿនៗមិត្តអ្នកអាន សៀវភៅជិតចេញហើយ!

កញ្ញា គ្រាប់ជី

ចុចអាន៖រឿង៖ ស្រលាញ់បងជ្រៅជាងសមុទ្រ ភាគទី១