ឯកឧត្ដម ឌី វិជ្ជា ជួយជ្រោមជ្រែងការចូលអានព្រីមៀមមិនគិតថ្លៃ សម្រាប់គ្រូបង្រៀននិងកម្មករ-កម្មការិនីទូទាំងប្រទេស

ដោយមានការជ្រោមជ្រែងពី ឯកឧត្តម ឧត្ដមសេនីយ៍ឯក ឌី វិជ្ជា និងលោកជំទាវ នៅក្នុងយុទ្ធនាការដ៏ធំមិនធ្លាប់មានមួយ ម្ចាស់គេហទំព័រ meysansotheary.com បានប្រកាសផ្តល់ឥតគិតថ្លៃលើមាតិកាព្រីមៀម ដែលជាមាតិការឿងដ៏ល្អកំពុងល្បី មានរាប់រយចំណងជើង ជូនចំពោះគ្រូបង្រៀនទូទាំងប្រទេស មិនថាផ្នែកសាលារដ្ឋឬក៏ឯកជន។

មិនត្រឹមតែប៉ុណ្ណោះ កម្មការិនី-កម្មករក៏ទទួលបាននូវលក្ខខណ្ឌដ៏ពិសេសនេះ គឺអានមិនគិតថ្លៃពេញមួយឆ្នាំដូចៗគ្នា។

**ឯកឧត្តម ឧត្ដមសេនីយ៍ឯក ឌី វិជ្ជា និងលោកជំទាវ ហ៊ុន ម៉ាណា**

នៅក្នុងបទសម្ភាសមួយ អ្នកនិពន្ធ ម៉ីសន សុធារី បានលើកឡើងថា “ខ្ញុំមានបំណងជាយូរមកហើយ ថាត្រូវធ្វើអ្វីម្យ៉ាងដើម្បីជាការតបស្នងទៅដល់គ្រូបង្រៀនរបស់ខ្ញុំ។ ខ្ញុំអាចសរសេរតួអក្សរនីមួយៗ រហូតដល់ក្លាយជាឃ្លាពេញលេញ មានបែបបទណែងណង មានអត្ថន័យ អត្ថរូបនិងអត្ថរស មានគេហៅថាជាអ្នកនិពន្ធ មានឈ្មោះតិចតួច គឺជាញើសឈាម កម្លាំងកាយពលកម្ម កម្លាំងចិត្តដែលលោកគ្រូអ្នកគ្រូរបស់ខ្ញុំបានខិតខំបង្ហាត់បង្រៀនតាំងពីក្មេង”។

ឥឡូវនេះជាការតបស្នងក្រុមការងារ meysansotheary.com បានសម្រេចចិត្តថា នឹងជូនគណនេយ្យនៃការចូលអានមិនគិតថ្លៃ ចំពោះគ្រូបង្រៀនទូទាំងប្រទេស។

អ្នកស្រីបន្ថែមទៀតថា ដោយឃើញថា បញ្ហាព័ត៌មានក្លែងបន្លំ និងមាតិកាឥតគុណតម្លៃ កំពុងកើនមានច្រើននៅលើបណ្ដាញសង្គម បង្កាត់ចលាចលគំនិត ភាពតានតឹង ហើយមានអ្នកចំណាយពេលច្រើនហួសហេតុទៅលើបណ្ដាញមួយនោះ ដូច្នេះក៏បន្ថែមក្រុមកម្មករកម្មការិនីមួយក្រុមទៀត ដែលមានសិទ្ធិទទួលការអានមិនគិតថ្លៃពេញ១២ខែ ដើម្បីឲ្យគាត់រៀនសិក្សាពីសារៈសំខាន់នៃការអាន។

«យ៉ាងហោចណាស់យើងមានអ្នកនិពន្ធពីរបីរូបដែលមានប្រភពចេញមកពីក្រុមកម្មករកម្មការិនី! ខ្លះក្នុងនោះផងដែរ បានក្លាយទៅជាអ្នកនិពន្ធ ដោយសារតែគាត់ចូលចិត្តការអាន តស៊ូអាន ដែលជាធម្មតាការអានបង្កើនចំណេះ បណ្ដុះនិងបំផុសនូវស្មារតីនៃការចាប់ផ្តើមសរសេររបស់គាត់! គាត់សរសេរបានល្អទៀត!»

អ្នកនិពន្ធម៉ីសនសុធារី បានបង្កើតឡើងនូវមាតិកា meysansotheary.com ដែលជាវេទិកាអានប្រលោមលោកឌីជីថលដ៏ជោគជ័យមួយនៅកម្ពុជា ក្នុងនោះមានមាតិកាមួយចំនួនអ្នកចង់អានតម្រូវឱ្យបង់ប្រាក់និងមាតិកាខ្លះអានដោយមិនគិតថ្លៃ។

ជាទូទៅ ទៅមាតិកាបង់ប្រាក់ឬព្រីមៀម គឺបង្កប់ទៅដោយរឿងឬសៀវភៅអនឡាញ ដែលបានជាវពីអ្នកនិពន្ធល្បីៗមានតម្លៃខ្ពស់ រួមជាមួយស្នាដៃរបស់អ្នកស្រីផ្ទាល់ ។ ចំណែកអានមិនគិតថ្លៃគឺជាស្នាដៃរបស់ប្អូនៗយុវវ័យជំនាន់ថ្មី។

នៅក្នុងការអានព្រីមៀមនេះ អ្នកអានតម្រូវឲ្យបង់ប្រាក់ចំនួនមួយម៉ឺនប្រាំពាន់រៀលនៅក្នុងមួយខែ ស្មើនឹងប្រាំរយរៀលក្នុងមួយថ្ងៃ ឬដប់ម៉ឺនរៀលក្នុងមួយឆ្នាំ ដូច្នេះតម្លៃដប់ម៉ឺននេះគឺ ផាត់ចោលទាំងស្រុងសម្រាប់មិត្តអ្នកអានណាដែលមកចុះឈ្មោះ ហើយមានកាតជាគ្រូបង្រៀនឬមួយជាកម្មករកម្មការិនីរោងចក្រ ។

នៅពេលសួរអំពីអ្នកសារព័ត៌មាន អ្នកស្រីយល់ស្របថា អ្នកសារព័ត៌មានទូទាំងប្រទេសនឹងទទួលបាននូវលក្ខខណ្ឌនេះផងដែរ។

យ៉ាងណាមិញ នេះមិនមែនជាលើកទីមួយទេដែល អ្នកនិពន្ធ ម៉ីសន សុធារី បានធ្វើសកម្មភាពសង្គមជាច្រើនដោយអ្នកស្រីបានចំណាយញើសឈាមពេលវេលានិងថវិកាផ្ទាល់ខ្លួន ក្នុងការបណ្ដុះបណ្ដាលអ្នកនិពន្ធជាច្រើនជំនាន់ថែមទាំងរហូត ដល់ទទួលយកស្នាដៃនិងផ្តល់រង្វាន់ជូនជារៀងរាល់ខែ។

អ្នកស្រីបញ្ជាក់ថា មានសប្បុរសជនជាច្រើន បានរួមចំណែកលើការងារនេះព្រោះស្រលាញ់វិស័យអំណាន ដែលក្នុងនោះ ឯកឧត្តម នាយឧត្តមសេនីយ៍ឯកឌី វិជ្ជា និងលោកជំទាវបានចូលរួមជ្រោមជ្រែងជាដរាប មកទើបអាចដំណើរការបាន។

គួរបញ្ជាក់ដែរថា នេះគឺជាសកម្មភាពសង្គមលើកកម្ពស់វិស័យអំណានដ៏ធំមួយ ដែលមិនធ្លាប់មាន ហើយដែល អ្នកស្រីសង្ឃឹមថា នឹងនាំឲ្យមានការផ្លាស់ប្តូរជាវិជ្ជមានទៅក្នុងរវាងរយៈពេលប្រាំឆ្នាំទៅមុខទៀត។

«ខ្ញុំយល់ថា កាលណាមានការអានច្រើន អ្នកនិពន្ធនិងលេចចេញពីក្រុមអ្នកអានកាន់តែផុលផុសថែមទៀត ដើម្បីជួយជ្រោមជ្រែងដល់វិស័យនេះ»។

អ្នកនិពន្ធ #ម៉ីសនសុធារី ត្រូវបានគេស្គាល់ច្រើនតាមរយៈប្រលោមលោកទំនើបកម្ម និងតថភាពនៃដំណើរសង្គម បង្កប់ជាមួយខ្លឹមសារអប់រំ ទេពកោសល្យពិបាកស្មានលើគ្រប់ស្នាដៃ។

ជានិច្ចជាកាលអ្នកអានរបស់គាត់ តែងតែជក់ចិត្តស្លុងក្នុងបណ្តាបទពិពណ៌នា ប្រៀបដូចកំពុងស្ថិតនៅក្នុងហេតុការណ៍។ អ្នកនិពន្ធរូបនេះបានកសាងកេរ៍ឈ្មោះ ជាមួយសាច់រឿងស៊ើបអង្កេត ឧក្រិដ្ឋកម្ម ដោយប្រើនាមប៉ាកា #សុភាប្រុស ផ្សាយចេញនូវកម្រងវណ្ណកម្មមិនរុះរោយ ដូចជា #ម៉ោង១២អាធ្រាត្រនៅសង្កាត់លេខមួយ #ស្ទូឌីយោលេខ៣ #BlankblackPicture #សំណុំឯកសារZ22 #គម្រោងការ2035.ល។