នៅថ្ងៃទី២០ ខែវិច្ឆិកា ឆ្នាំ២០២៣នេះ ក្រសួងវប្បធម៌ និងវិចិត្រសិល្បៈ បានរៀបចំពិធីប្រកាសម្ចាស់ជយលាភី ព្រះនាងឥន្ទ្រទេវី ទាំង១០រូប លើផ្នែកប្រលោមលោកខ្លី និងផ្នែកកំណាព្យ ដោយក្នុងនោះ សម្រាប់ម្ចាស់ជយលាភី ពីលេខ១ ដល់លេខ៣ ទាំងពីរផ្នែក គឺទទួលបានពានមាស ពានប្រាក់ និងពានសំរិទ្ធ។
ក្នុងចំណោមម្ចាស់ជយលាភីទាំង៥រូប លើផ្នែកប្រលោមលោកខ្លី មានបុរសចំនួន៣នាក់ និងស្រីចំនួន ២នាក់៖
– ជយលាភីលេខ១ ពានមាស បានទៅលើរឿង “ព្រលឹងគុហនគរ” និពន្ធដោយលោក ផាត ភឿក មកពីខេត្តកំពង់ចាម។
– ជយលាភីលេខ២ ពានប្រាក់ បានទៅលើរឿង “រចនា” និពន្ធដោយអ្នកស្រី ធា សុភី មកពីរាជធានីភ្នំពេញ។
– ជយលាភីលេខ៣ ពានសំរឹទ្ធ បានទៅលើរឿង “រាជិនីល្បុក្កតោ” និពន្ធដោយលោក វង្ស សុភាជ មកពីខេត្តព្រៃវែង។
– ជយលាភីលេខ៤ បានទៅលើរឿង “ភ្លើងឆេះរោងរបាំ” និពន្ធដោយលោក ចាន់ ថាភារុន មកពីខេត្តកំពង់ចាម។
– ជយលាភីលេខ៥ បានទៅលើរឿង “មេ” និពន្ធដោយកញ្ញា ជា សុលីនី មកពីរាជធានីភ្នំពេញ។
ចំណែកផ្នែកកំណាព្យរឿងវិញ មានបុរសចំនួន៤នាក់ និងស្រីចំនួន ១នាក់៖
– ជយលាភីលេខ១ ពានមាស បានទៅលើកំណាព្យរឿង “វណ្ណៈស្នេហ៍ប្រែពណ៌” និពន្ធដោយលោក ចំរើន សុភ័ក្រ្ត មកពីខេត្តកំពត។
– ជយលាភីលេខ២ ពានប្រាក់ បានទៅលើកំណាព្យរឿង “រំដួលវតី” និពន្ធដោយលោក សុវណ្ណ សិរីវុឌ្ឍ មកពីរាជធានីភ្នំពេញ។
– ជយលាភីលេខ៣ ពានសំរឹទ្ធ បានទៅលើកំណាព្យរឿង “សម្បាច់នារី” និពន្ធដោយលោក ទៀង ធន មកពីខេត្តព្រៃវែង។
– ជយលាភីលេខ៤ បានទៅលើកំណាព្យរឿង “វិមានម៉ារ៉ានី” និពន្ធដោយលោក ស៊ឹម គឹមសាត មកពីខេត្តត្បូងឃ្មុំ។
– ជយលាភីលេខ៥ បានទៅលើកំណាព្យរឿង “មាសទឹកដប់” និពន្ធដោយកញ្ញា កាន ស្រីនីត មកពីខេត្តព្រៃវែង។
ក្រៅពីជយលាភីទាំង១០រូបខាងលើ ក៏មានការផ្ដល់បណ្ណកិត្តិយស ដល់បេក្ខជន បេក្ខនារីចំនួន៥រូប បន្ថែមទៀត ផ្នែកប្រលោមលោកខ្លី និង៥រូប ផ្នែកកំណាព្យរឿងផងដែរ។
បើតាមនាយដ្ឋានសៀវភៅនិងការអានបញ្ជាក់ថា សម្រាប់ការដាក់ប្រកួតស្នាដៃតែងនិពន្ធឆ្នាំ២០២៣ មានបេក្ខជនចូលរួមដាក់ស្នាដៃប្រលង ចំនួន១១៤ស្នាដៃ ក្នុងនោះ មានប្រលោមលោកខ្នាតខ្លីចំនួន ៨៦ស្នាដៃ និងកំណាព្យរឿងចំនួន ២៨ស្នាដៃ៕
យល់យ៉ាងណាដែរចំពោះសាច់រឿងខាងលើ