ក្នុងនោះផងដែរ ក៏មិនខុសពីកាលពីខែសីហា ប្រលោមលោករបស់អ្នកនិពន្ធម្នាក់ៗនៅតែតាមប្រកៀកគ្នាក្នុងការឈរលើចំណាត់ថ្នាក់កំពូលៗ។ ប៉ុន្តែយ៉ាងណាក៏ដោយ នៅទីបំផុតក្រុមការងារបានរកឃើញជើងខ្លាំង៨រូបដូចខាងក្រោម។

អ្នកទី ១ បានទៅលើម្ចាស់ស្នាដៃរឿង ស្វាមីចចក ពីអ្នកនិពន្ធ សុធន ចន ទទួលបានចំណាត់ថ្នាក់ ​Top4 វ៉ាដាច់ប្រលោមផ្សេងៗងទៀត។ ប្រភេទប្រលោមលោក Dark Romanticism នេះគឺជាប្រភេទនិទានមនោសញ្ចេតនា ឆ្លុះបញ្ចាំងពីចំណាប់អារម្មណ៍ក្តៅគគុក និងការប៉ះពាល់ស្និទ្ធស្នាល ឈុតឆាកស្នេហា​ជ្រាលជ្រៅ ឆក់កណ្តៀត បង្ខិបង្ខំ និងកំពុងទទួលបានពេញនិយមក្នុងសម័យកាលនេះ។

ទីពី ២ រឿង កូនក្រមុំទី៧ ជាស្នាដៃយ៉ាងសម្រិតសម្រាំងរបស់អ្នកនិពន្ធ រត្ន បញ្ចាកា​ ពេលនេះបានជាប់ចំណាតថ្នាក់ Top10 ប្រចាំខែកញ្ញា។

ទី ៣ រឿង ចិត្តត្រួតត្រា នៅតែទទួលបានចំណាត់ថ្នាក់ Top សឹងតែរាល់ខែ ខណៈខែកញ្ញានេះស្នាដៃរួមគ្នាក្នុងក្រុមសាមូរ៉ៃ ជាប់ Top 12។ ចំណែកឯកាលពីខែកក្កដាជាប់ Top19​  និងខែសីហាកន្លងទៅនេះជាប់ Top17។

ទី៤ រឿង បេះដូងខ្មៅ ពីម្ចាស់សា្នដៃ ហ៊ន បុនរ៉ា នៅក្នុងខែកញ្ញានេះ ទទួលបានចំណាត់ថ្នាក់ Top 15។

ទី៥​ រឿង អតីតផ្ទះមន្រ្តី ជាស្នាដៃរបស់អ្នកនិពន្ធ វណ្ណ វីរីយ៉ា ជាប់ក្នុងតារាង Top16 ប្រចាំខែកញ្ញា ខណៈដែលកាលពីខែកក្កដា ប្រលោមលោកនេះជាប់ Top 13 ។

ទី៦ រឿង ម៉ែយាយ ពីអ្នកនិពន្ធ MST Writer រដូវកាលទី១ ពេលនេះជាប់ចំណាត់ថ្នាក់ Top 17 ប្រចាំខែកញ្ញា។ សាច់រឿងនេះផងដែរបានបរិយាយអំពីជីវិតរបស់លោកយាយមេម៉ាយចំណាស់ម្នាក់រស់នៅជាមួយកូនប្រុសពៅពិការក្នុងជីវភាពមិនសូវជាធូធារ តែសុខចិត្តយកចៅប្រុសពីរនាក់របស់គាត់យកមកចិញ្ចឹមបន្ថែមទៀតដើម្បីឱ្យកូនប្រុសបង្កើតនិងកូនប្រសាស្រីរបស់គាត់ងាយស្រួលរកស៊ីនៅឯទីក្រុង។ ជាអកុសល ចៅប្រុសទាំងពីររបស់គាត់ជាក្មេងដែលមិនលុះក្នុងគន្លងធម៌ ចូលចិត្តបង្ករឿងធ្វើឱ្យគាត់ឈឺក្បាលមិនចេះចប់មិនចេះហើយ។ ចំណែកឯកូនប្រសាស្រីរបស់គាត់វិញតែងតែឈ្លោះប្រកែកជាមួយប្ដីហើយរករឿងបំបាក់មុខគាត់ជារឿយៗដែលធ្វើឱ្យបញ្ហាទាំងនោះរួមផ្សំគ្នាក្លាយទៅជាម្ជុលចាក់ដើមទ្រូងរបស់លោកយាយបង្កើតជាក្ដីទុក្ខសោកដ៏សម្ងាត់ដែលពិបាកនឹងពាល់ត្រូវ។

ទី៧​ រឿង រៀបការសងគំនុំ ជាស្នាដៃរួមគ្នាក្នុងក្រុមសាមូរ៉ៃ ដោយពេលនេះទទួលបាន Top 18 ​ក្នុងខែកញ្ញា។

និងទី ៨ រឿង យប់មួយនៅសាលាកណ្ដាលព្រៃ ជាស្នាដៃរបស់អ្នកនិពន្ធស្រី អ៊ឹម អានដាដាណេត និងជាសមាជិកមួយរូបនៅក្រុមនាគា MST writer  រដូវកាលទី១។ សាច់រឿងដ៏រន្ធត់នេះ បានជាប់ចំណាត់ថ្នាក់ក្នុង Top 19នៅក្នុងខែកញ្ញា៕

កញ្ញា គ្រាប់ជី

ចុចអាន៖អបអរសាទរ ប្រលោមលោករបស់ MST Writer ដែលមានអ្នកចូលមើលច្រើនប្រចាំខែសីហា

សម្រាប់ខែសីហានេះផ្ទាល់ ​ត្បិតថាមានប្រលោមលោករបស់អ្នកនិពន្ធជាច្រើន តាម​ប្រកៀក​គ្នា​យ៉ាងស្អិតក៏ពិតមែន ប៉ុន្តែយ៉ាងណាក៏ដោយ ​ក្រោយ​មក​ទើប​រកឃើញ​អ្នក​កំពូលៗនៅ​ក្នុងរដូវកាលថ្មីនេះ​ដោយមានដល់ទៅ Top19ឯណោះ។

ទីមួយ អ្នកនិពន្ធ វណ្ណវី រីយ៉ា ជាម្ចាស់ស្នាដៃរឿង អតីតផ្ទះមន្រ្តី ទទួលបានចំណាត់ថ្នាក់ ​Top10 ហើយកាលពីខែកក្កដា ប្រលោមលោកមួយនេះ ជាប់ក្នុងតារាង Top 13 ។

ទីពីរ អ្នកនិពន្ធ ហ៊ុយ សារ៉ាត ជាម្ចាស់សា្នដៃរឿង ខ្ញុំមិនយកទេម៉ែ! ជាប់ចំណាត់ថ្នាក់ Top 16 នៅក្នុងខែសីហាកន្លងទៅនេះ។

ទី៣ ក្រុមសាម៉ូរ៉ៃ ជាម្ចាស់ស្នាដៃរួមគ្នាក្នុងរឿង ចិត្តត្រួតត្រា នាខែសីហានេះជាប់ចំណាត់ថ្នាក់ Top17 ក្នុងពេលដែលខែកក្កដា ប្រលោមលោកមួយនេះជាប់ក្នុងតារាង Top19​។

ចំណែកឯទី៤ គឺជាម្ចាស់ស្នាដៃ រឿង អាថ៌កំបាំងក្លិនផ្កាឡាវែនដឺ  ដែលជាស្នាដៃដំបូងរបស់អ្នកនិពន្ធ​វ័យក្មេង​មាន​នាមប៉ាកកា អាកាស្យា ទើបតែចេញ​លើ​វេបសាយ meysansotheary.com មិនបានប៉ុន្មាននោះទេ។ ប៉ុន្តែកំពុងទទួលការគាំទ្រ​ពីសំណាក់​អ្នក​ចូលចិត្ត​ក្ដី​ស៊ើប​អង្កេត​ ដោយបាន​​ឡើងដល់តារា Top19 ខណៈដែលកាលពីខែកក្កដា ឡើងដល់តារា Top15 ៕

កញ្ញា គ្រាប់ជី

ចុចអាន៖អបអរសាទរ ប្រលោមលោករបស់ MST Writer ដែលមានអ្នកចូលមើលច្រើនប្រចាំខែ មិថុនា និង កក្កដា

ដោយឡែកសម្រាប់ខែកក្កដានេះផ្ទាល់ ​ប្រលោមលោករបស់អ្នកនិពន្ធជាច្រើន ​ហាក់តាម​ប្រកៀក​គ្នា​យ៉ាងស្អិត រហូតរកឃើញអ្នកកំពូលៗនៅក្នុងរដូវកាលថ្មីនេះដោយមានដល់ទៅ Top20​ ឯណោះ។

១ រឿង ព្រាយគោកចំបក់ គឺសាច់រឿងបែបរន្ធត់ព្រឺព្រួចរបស់និពន្ធ ម៉ក់ខេមរិន្រ្ទ បានឡើងដល់តារាងកំពូល Top9 កាលពីខែកក្កដា ខណៈកាលពីរដូវកាលទី១ ប្រលោមលោក​បែប​ស៊ើបអង្កេតរឿង ៤៨ម៉ោង បំបែក​ក្ដី​ឃាតកម្មរបស់​លោក​បានឈរឈ្មោះនៅក្នុង Top ១៥​ លើ​វេបសាយ meysansotheary.com កាលពី​ខែ​កុម្ភៈកន្លងទៅនេះ។

២ រឿង អតីតផ្ទះមន្រ្តី ជាស្នាដៃរបស់អ្នកនិពន្ធ វណ្ណ វីរីយ៉ា ជាប់ក្នុងតារាង Top 13 ក្នុងខែកក្កដា។

៣ រឿង អាថ៌កំបាំងក្លិនផ្កាឡាវែនដឺ ដែលជាស្នាដៃដំបូងរបស់អ្នកនិពន្ធ​វ័យក្មេង​មាន​នាមប៉ាកកា អាកាស្យា ទើបតែចេញ​លើ​វេបសាយ meysansotheary.com និងកំពុងទទួលការគាំទ្រ​ពីសំណាក់​អ្នក​ចូលចិត្ត​ក្ដី​ស៊ើប​អង្កេត​ ពេលនេះ​បាន​ឡើងដល់តារា Top15។

៤ រឿងផ្លូវគេ ជាប្រលោមបែបរន្ធត់របស់អ្នកនិពន្ធ ហ៊ុយ សារ៉ាត់ ដែលជាប់ Top16 នៅក្នុងខែកក្កដា ខណៈសាច់រឿងមួយនេះចេញភ្លាមទទួលបានការគាំទ្រយ៉ាងច្រើនពីសំណាក់អ្នកគាំទ្រដែលនិយមអានរឿងរន្ធត់ញាប់ញ័រ។

៥ រឿង កុំសន្យាអ្វីដែលអ្នកមិនដឹងច្បាស់ គឺជាស្នាដៃរួមគ្នាក្នុងក្រុម ហង្សៈ នារដូវកាលទីមួយដោយជាប់តារាង Top17។

៦ រឿង ប្រាថ្នានាងកំណត់ហេតុពូ និទានមនោសញ្ចេតនាថ្មីពីអ្នកនិពន្ធ MST Writer រដូវកាលទី៤ របស់អ្នកនិពន្ធ ម៉ក់ខេមរិន្រ្ទ  បានឡើងដល់តារាង​ Top18 ក្នុងខែកក្កដានេះ។

៧ រឿង ចិត្តត្រួតត្រា ជាស្នាដៃរួមគ្នាក្នុងក្រុមសាមូរ៉ៃ ដោយជាប់ក្នុងតារាង Top19​ ក្នុងខែកក្កដា។

៨ រឿង ណាគ្រី ជាស្នាដៃរបស់អ្នកនិពន្ធប្រុស លី គឹមសួ បន្ទាប់ពីចេញផ្សាយមិនបានប៉ុន្មានផង ប្រលោមបែបរន្ធត់ព្រឺព្រួចមួយនេះជាប់ចំណាតថ្នាក់ Top20 ​ក្នុងខែកក្កដានេះតែម្ដង៕

កញ្ញា គ្រាប់ជី

ចុចអាន៖ប្រលោមលោកមនោសញ្ចេតនា «មិនសារភាព ព្រោះមិនសក្ដិសម» របស់អ្នកនិពន្ធ រឿង នុរា ចេញផ្សាយយប់នេះ

សម្រាប់រដូវកាលដែលនៅតែទទួលស្នាដៃ មាន​ MST Writer រដូវកាលទី២, ៣ និង ៤ ខណៈ កាលពីរដូវកាលទីមួយទទួលបាន​ជោគជ័យ ​និង​បញ្ចប់​ទៅដោយរលូន ​ក្នុងនោះគេ​ឃើញ​មានអ្នក​និពន្ធ​វ័យ​ក្មេង​ស្រករ​ក្រោយជាច្រើន​បាន​បញ្ចេញ​ស្នាដៃ​ នៅលើវេបសាយឌីជីថល​របស់​អ្នកនិពន្ធ ម៉ីសន សុធារី រហូត​ឈាន​ដល់បើកវគ្គថ្មីក្នុងកម្មវិធី MST Writer រដូវកាលទី ២ ក្រោម​ប្រធានបទ «អ្នក​និពន្ធ​ជុំវិញ​បឹង​ទន្លេ​សាប»​ ចាប់ផ្ដើម​កាលពីខែឧសភា ឆ្នាំ ២០២២កន្លងទៅ ។

យ៉ាងណាមិញ​ មិនខុសពីរដូវកាលទីមួយទេ ក្រោយ​ជោគជ័យ​ជាបន្តបន្ទាប់ទើបអ្នកនិពន្ធ ម៉ីសនសុធារី សម្រេច​បញ្ចេញ​រដូវកាលទីបី ក្រោមប្រធានបទ «ដែននិរតី» ។ រៀមច្បងរូបនេះ​ធ្លាប់ផ្ដល់​បទសម្ភាសន៍​មួយថា ​នឹង​ជ្រើសរើសស្នាដៃពីជនវ័យក្មេង សិស្ស និស្សិត គ្រូបង្រៀន​មន្ត្រី​រាជការ​រូបណាដែលមានបំណងចង់ចូលរួម​នៅក្នុងការ​បញ្ចេញស្នាដៃ​តែងនិពន្ធក៏ដូចជាទទួលបាន​វគ្គសិក្សាខ្លីៗដែលបង្ហាត់បង្ហាញរំលែកបទពិសោធន៍ដោយ​អ្នកស្រីផ្ទាល់ និង​អ្នកនិពន្ធផ្សេង​ទៀតនៅក្នុងក្រុម MST។

ទោះយ៉ាងណាក៏ដោយ MST Writer បានត្រលប់មកវិញជាមួយរដូវកាលទី៤ ក្រោមប្រធានបទ «និពន្ធដើម្បីបង្កើនក្តីស្រលាញ់» ដោយប្រមូល​យុវនិពន្ធ​ដែលមានបំណង​និងកំពុងស្វែងរកមធ្យោបាយ​ផ្សព្វផ្សាយ​បទនិពន្ធរបស់ខ្លួន អាចចូលរួមជាមួយរដូវកាលនេះបានដើម្បីធ្វើឲ្យសាច់រឿងរបស់អ្នកទាំងអស់គ្នាលេចចេញជារូបរាងនៅលើគេហទំព័រផ្លូវការ meysansotheary.com ។

គួរ​បញ្ជាក់​ដែរ​ថា MST Writer ទាំង ៤ ជំនាន់ មិនត្រឹមអាចបញ្ចេញស្នាដៃដល់​អ្នកអានមួយមុខនោះទេ។ ប៉ុន្តែយុវនិពន្ធ​ជំនាន់ថ្មីគ្រប់ៗគ្នា សុទ្ធតែទទួលបាន​រង្វាន់លើកទឹកចិត្តប្រចាំខែសម្រាប់ស្នាដៃដែលចូលក្នុង​កំពូលតារាងទាំង ២០ ផងដែរ៕

កញ្ញា គ្រាប់ជី

ជាមួយគ្នានេះ​ដែរ​ លក្ខខណ្ឌ​នៃ​ការចូលរួម​ត្រូវតម្រូវ​ឲ្យ​មាន​យ៉ាងហោចណាស់ ប្រលោមលោក​មួយ​មក​សុំ​ចុះឈ្មោះ មិន​កំណត់ចំនួនទំព័រ​ និង​សរសេរ​ដោយសេរី។ ដោយ​កាលណោះ​រដូវកាល​ទី​មួយ​ក្នុង​កម្មវិធី MST Writer ទទួល​បាន​ជោគជ័យ​យ៉ាង​ច្រើន​កុះករ​ ពី​សំណាក់​អ្នក​និពន្ធ​វ័យក្មេង​ជា​ច្រើន​រូប។

យ៉ាងណាមិញ​ រ៉ាហ្ស៊ី មិនខុសពីអ្នក​និពន្ធ​វ័យក្មេង​ដទៃ ខណៈរូបគេបាន​ប្រកួតប្រជែង​​ស្នាដៃ​ជាមួយអ្នក​ផ្សេង​ទៀត ​រហូត​ទទួលបានការពេញចិត្ត​​ពិនិត្យ​ពិច័យ ​និង​សម្រួល​ពី​រៀមច្បង​ ទើប​រូបគេឈាន​ដល់ទៅ ៥ រឿងតែ​ម្នាក់ឯង​ក្នុង​រដូវ​កាល​ទី​មួយ​ឯណោះ។

ខាងក្រោមនេះសុទ្ធសឹងតែជាស្នាដៃរបស់ រ៉ាហ្ស៊ី ៥ ចំណងជើងដែលលោកអ្នកគួរអាន​ ដើម្បីចង់ដឹងថាតើ​អ្នក​និពន្ធស្រករក្រោយរូបនេះមានទឹកដៃល្អយ៉ាងណាខ្លះ ទើបអាចសរសេរ ៥ ចំណងជើងបានយ៉ាងរហ័ស ក្នុងកម្មវិធី MST រដូវកាលទីមួយ។

១ រឿង៖ បើក្លាយជាប្តីគេ

២ រឿង៖ មនុស្សក្នុងចិត្ត

៣ សន្យា ១០០ ឆ្នាំ

៤ រឿង៖ មនុស្សសំខាន់

៥ រឿង៖ ទូរសព្ទចាស់

កញ្ញា គ្រាប់ជី

ចុចអាន៖ប្រលោមលោកមនោសញ្ចេតនាទាំង ៦ របស់អ្នកនិពន្ធ ម៉ីសន សុធារី ធ្លាប់ធ្វើឲ្យអ្នកអានកក់ក្ដៅបេះដូង

សម្រាប់បទនិពន្ធដែលមានចំនួនអ្នកអានច្រើនជាងគេរៀងរាល់ខែនីមួយៗ នឹងមានជារង្វាន់លើកទឹកចិត្តដល់ម្ចាស់រឿងទាំងអស់។ ដោយឡែកក្នុងខែកញ្ញានេះ ក្រុមការងារបានរកឃើញអ្នកនិពន្ធ២រូបដែលទទួលបានអ្នកចូលអានច្រើនជាងគេ ហើយស្ថិតក្នុងកំពូលមាតិកាទាំង២០។

១.អ្នកនិពន្ធ កូនស្វាតូច ម្ចាស់រឿង«ផ្ទះចាស់នៅភូមិម៉ាស៊ីនបូម»

សួស្ដីមិត្តអ្នកអានទាំងឡាយ! នាងខ្ញុំកូនស្វាតូច ជាម្ចាស់ស្នាដៃ រឿងផ្ទះចាស់ភូមិម៉ាស៊ីនបូម វាជារឿងដ៏រំភើបមួយសម្រាប់នាងខ្ញុំ ដោយស្នាដៃដែលរំលេចនូវតថភាពពិតលាយប្រតិដ្ឋមួយនេះបានទាក់ទាញចំណាប់អ្នកអានរហូតបានចូលទៅក្នុង Top 15 ប្រចាំខែកញ្ញានេះ ហើយវាក៏បានក្លាយជាកម្លាំងជម្រុញចិត្តឱ្យនាងខ្ញុំក្នុងការសរសេរបញ្ចប់នូវប្រលោមលោកថ្មីមួយទៀតផងដែរ។

នាងខ្ញុំសូមថ្លែងអំណរគុណយ៉ាងជ្រាលជ្រៅដល់មិត្តអ្នកអានទាំងអស់គ្នា ក៏ដូចជាក្រុមការងារ MST Writer ដែលបានជួយសម្របសម្រួលនិងបង្កើតជាមាតិកា​យ៉ាងច្រើនក្នុងការចែករំលែកបទពិសោធសម្រាប់អ្នកនិពន្ធថ្មោងថ្មីទាំងឡាយ។

២.អ្នកនិពន្ធ រ៉ាហ្ស៉ី ម្ចាស់រឿង«អ្នករត់បញ្ញើខ្មោច»

សួស្តី  ខ្ញុំរ៉ាហ្ស៊ី! អ្នកសរសេរមួយរូបដែលបានចូលរួមក្នុងការដាក់ស្នាដៃ MST Writer រដូវកាលទី៣នេះ ហើយក៏ជាម្ចាស់ស្នាដៃ នៃរឿងអ្នករត់បញ្ញើខ្មោច  ដែលបានចេញផ្សាយលើគេហទំព័ររបស់អ្នកគ្រូ ម៉ីសន សុធារី  និងបានជាប់ក្នុងតារាងកំពូលទី១៩នៃតារាងមាតិកាកំពូលប្រចាំខែកញ្ញា។

ពិតណាស់ រឿងនេះ ខ្ញុំពិតជាត្រេកអរនិងសប្បាយចិត្តក្រោយពេលដឹងថា សាច់រឿងមួយនេះ មានការពេញនិយមពីសំណាក់អ្នកអាន ព្រោះវាជាសាច់រឿងថ្មីសន្លាងមួយដែលខ្ញុំគិតស្រមៃគ្រោងជាប្រលោមលោកខ្នាតវែង ប៉ុន្តែព្រោះតែកត្តាពេលវេលានិងភាពរវល់ផ្ទាល់ខ្លួន គឺបានត្រឹមតែសរសេររឿងខ្លីយកមកដាក់ជូនឲ្យគ្រប់គ្នាអានជាមុនសិន។  អូហ៍..ជ្រុលនិយាយដល់រឿងនេះហើយ សូមផ្ដាំជូនដល់អ្នកសរសេរ ឬអ្នកមានរឿងរបស់ខ្លួនរួចហើយ សូមកុំលាក់ទុកអានតែម្នាក់ឯងអី ចាប់ផ្តើមជាមួយការផ្សាយស្នាដៃរបស់ខ្លួនដាក់ស្នាដៃក្នុងកម្មវិធីនេះ ទាំងរដូវកាលទី២និងទី៣ ព្រោះនេះជាឱកាសល្អ ជារឿងមួយដែលអ្នកអាចដឹងពីចំណុចខ្សោយ និងមតិរបស់អ្នកផ្សេងទៀត អ៊ីចឹងសូមរួសរាន់ឡើង ឱកាសមកដល់ហើយ គួរតែស្រវាចាប់យក។

ចុងក្រោយ ខ្ញុំមានតែពាក្យអរគុណអ្នកគ្រូម៉ីសនសុធារី និងក្រុមការងារដែលតែងតែជួយ ខ្នះខ្នែងជម្រុញឱ្យមានកម្មវិធីនេះឡើង និងអរគុណមិត្តអ្នកអានដែលតែងតែគាំទ្រស្នាដៃខ្ញុំមួយនេះ…អរគុណអ្នកអានគ្រប់គ្នានៅទីនេះ ហើយកុំភ្លេចជួយគាំទ្រសាច់រឿងក្រោយៗរបស់ខ្ញុំទៀតផង។

ចុចអាន MST Writerដែលមានអ្នកចូលអានច្រើនជាងគេប្រចាំខែសីហា

នៅក្នុងខែកក្កដានេះផ្ទាល់ ស្នាដៃដែលបានឡើងដល់កំពូលមាតិកាទាំង២០ មានចម្រុះគ្នាតាំងពីរដូវកាលទី១រហូតដល់ទី៣ ដោយផ្អែកតាមចំនួននៃការចុចអាននៅលើវេបសាយផ្លូវការ meysansotheary.com ពីប្រិយមិត្តអ្នកអានផ្ទាល់។

១.អ្នកនិពន្ធ លោកម្ចាស់ ម្ចាស់រឿង«ដើមជ្រៃធំនៅស្រុកបសេដ្ឋ»

ជម្រាបសួរមិត្តអ្នកអានទាំងឡាយ! ខ្ញុំមាននាមប៉ាកកា លោកម្ចាស់ ជាអ្នកនិពន្ធរឿងដើមជ្រៃធំនៅស្រុកបសេដ្ឋ ដែលបានចេញផ្សាយក្នុងកម្មវិធី MST Writer រដូវកាលទី៣។ ខ្ញុំមិននឹកស្មានទេថា រឿងរន្ធត់មួយនេះ អាចទាញយកចំណាប់អារម្មណ៍ពីសំណាក់មិត្តអ្នកអានបាន ព្រោះថាខ្ញុំគ្រាន់តែចង់ចែករំលែករឿងរ៉ាវពិតដែលលោកតារបស់ខ្ញុំបានជួបប្រទះកាលពីជំនាន់នោះតែប៉ុននោះ ប៉ុន្តែរឿងមួយនេះក៏បានក្លាយជារឿងដ៏គួរឱ្យចាប់អារម្មណ៍រហូតទទួលបាន Top 11 ប្រចាំខែសីហានេះ ដែលជាកម្លាំងចិត្តដ៏ធំសម្រាប់ខ្ញុំ ជាអ្នកនិពន្ធថ្មីមួយរូប។

ខ្ញុំសូមអរគុណយ៉ាងខ្លាំងដល់មិត្តអ្នកអានទាំងអស់ ជាពិសេសសូមអរគុណដល់ក្រុមការងារដែលបានរៀបចំកម្មវិធីនេះឡើងដែលជាឱកាសមួយអាចឱ្យខ្ញុំបានបញ្ចេញស្នាដៃរបស់ខ្លួនបាន។

២.អ្នកនិពន្ធ ចាន់ ពុទ្ធី ម្ចាស់រឿង «គុយទាវគោក»

ជាថ្មីម្តងទៀត បន្ទាប់ពីបានចូលរួមក្នុងចែករំលែកនូវស្នាដៃរបស់ខ្លួនផ្ទាល់លើគេហទំព័រឬវេបសាយ meysansotheary.com នេះជាលើកដំបូងដែលអត្ថបទនិពន្ធរបស់ខ្ញុំត្រូវបានអ្នកអានពេញចិត្តច្រើន បន្ទាប់ពីកម្រងរឿងខ្លីរបស់ក្រុមនាគាដែលធ្លាប់បានជាប់ក្នុងចំណាត់ថ្នាក់ប្រជាប្រិយ២ដងកន្លងទៅ។ ខ្ញុំពិតជាមានសេចក្តីរីករាយណាស់ចំពោះលទ្ធផលផ្លែផ្កានេះ វាបង្ហាញឱ្យខ្ញុំបានឃើញពីភាពរីកចម្រើនជាងមុនក្រោយពេលមកកាន់ទីនេះ។ ម្យ៉ាងទៀត ក្រៅពីអ្នកអានដែលបានជម្រុញកម្លាំងចិត្ត បណ្តាញក្រុមអ្នកនិពន្ធនេះគឺមានសារៈសំខាន់មែនទែនសម្រាប់ការផ្សារភ្ជាប់ទំនាក់ទំនង មិនតែប៉ុននោះជួយផ្តល់ឱកាសដល់អ្នកដែលមានទេពកោសល្យនិងស្រឡាញ់វិថីនេះបានស្វែងយល់នឹងត្រៀមខ្លួនដើម្បីសាកឈានជំហានរបស់ខ្លួនឯង។

ជាទីបញ្ចប់ ខ្ញុំសូមអរគុណដល់ក្រុមការងារ MST writer ទាំងអស់ដែលតែងជួយសម្របសម្រួលនិងចែករំលែកបទពិសោធគ្នាកន្លងមក។ សង្ឃឹមថាកម្មវិធីនេះនឹងកាន់តែរីកដុះដាលយ៉ាងទូលំទូលាយបន្ថែមទៀត។

៣.អ្នកនិពន្ធ ហេង អ៊ីឈង ម្ចាស់រឿង«ផ្ទះគេទុកចោល»

ទាំងអស់នេះជាអ្វីដែលខ្ញុំមិនរំពឹងសោះថា រឿងផ្ទះគេទុកចោល ដែលចេញផ្សាយតាំងពីខែវិច្ឆិកា ឆ្នាំ២០២១ ត្រូវបានទទួលការគាំទ្រពីមិត្តអ្នកអាននាពេលនេះ រហូតបានឡើងដល់ Top 16 ក្នុងខែសីហានេះ។ នាងខ្ញុំសប្បាយចិត្តក្រោយពេលសរសេររឿងមួយចប់ ហើយកាន់តែរីករាយក្រោយទទួលដំណឹងថារឿងនាងខ្ញុំមានអ្នកអាន។ សូមអរគុណដល់ក្រុមការងារ MST Writer ដែលបានទទួលចេញផ្សាយស្នាដៃនាងខ្ញុំ។

៤.អ្នកនិពន្ធ ឈាន ឌី ម្ចាស់រឿង«ពិធីជប់លៀង»

តាមពិតទៅខ្ញុំមិនដែលគិតថារឿងរបស់ខ្ញុំបានចូលដល់ Top 18 ប្រចាំនេះនោះឡើយ ព្រោះថារឿងដែលខ្ញុំសរសេរនៅខ្វះចន្លោះច្រើន មិនទាន់ទាំងហ៊ាននិយាយថាចេះសរសេររឿងផង ម្យ៉ាងទៀតដោយសារនេះជារឿងដំបូងបំផុត គឺរឿងទី១របស់ខ្ញុំដែលបានសរសេរឡើង ទើបខ្ញុំគិតថារឿងខ្ញុំគ្មានអ្នកអានឡើយ។ ប៉ុន្តែខ្ញុំពិតជាសប្បាយចិត្តដែលរឿងមួយនេះ ស្រាប់តែមានអ្នកអានច្រើនរហូតដល់បានចូលដល់មាតិកាទី១៨ប្រចាំខែសីហា។ 

ខ្ញុំសូមអរគុណដល់បងៗក្រុមការងារដែលបានចេញផ្សាយរឿងរបស់ខ្ញុំដាក់ក្នុងវេបសាយ meysansotheary.com ។ សូមអរគុណ!

៥.អ្នកនិពន្ធ ហ៊ុយ សារ៉ាត់ ម្ចាស់រឿង«ព្រហ្មចារី»

ជាដំបូង ខ្ញុំសូមនិយាយថា WOW! ដោយមិននឹកស្មានថារឿងនេះនៅតែទទួលបាននូវការគាំទ្រពីសំណាក់អ្នកអាន រហូតដល់ទទួលបាន Top 20 បែបនេះទេ។ នេះជាអ្វីដែលខ្ញុំមិនបានរំពឹងទុក ហើយវាបានកើតឡើងទាំងដែលមិនគួរឱ្យជឿ។ ខ្ញុំសូមអរគុណដល់ក្រុមការងារនិងអ្នកគ្រូម៉ីសន សុធារី ដែលបានរៀបចំកម្មវិធីនេះឡើង។ សូមឱ្យអ្នកនិពន្ធដែលមានបំណងដាក់ស្នាដៃក្នុងកម្មវិធីនេះ ទាំងរដូវកាលទី២និងទី៣ សូមរួសរាន់ឡើង ឱកាសមកដល់ហើយ គួរតែស្រវាចាប់យក។ ជាចុងក្រោយ ខ្ញុំសូមឱ្យអ្នកគាំទ្រស្នាដៃខ្ញុំ នៅតែបន្តគាំទ្រទៀតផង ព្រោះនៅរដូវកាលទី៣ ខ្ញុំនឹងមានអ្វីថ្មីសម្រាប់ចែកជូនការអានបន្ថែម។

៦.អ្នកនិពន្ធ រ៉ាហ្ស៉ី ម្ចាស់រឿង«មនុស្សទីងមោង»

សួស្តី  ខ្ញុំរ៉ាហ្ស៊ី! អ្នកសរសេរមួយរូបដែលបានចូលរួមក្នុងការដាក់ស្នាដៃ MST Writer រដូវកាលទី៣នេះ។ ដំបូងខ្ញុំពិតជាមានអារម្មណ៍រំភើប ត្រេកអរណាស់ដែលស្នាដៃរឿងថ្មី “មនុស្សទីងមោង” បានជាប់ក្នុងតារាងកំពូលទី២០នៃតារាងមាតិកាកំពូលប្រចាំខែសីហា។

ពិតណាស់ រឿងនេះមិនមែនជារឿងដំបូង ឬរឿងទី២ទេ តែនេះជាស្នាដៃទី៨ ដែលខ្ញុំបានដាក់ចូលរួម។ ច្រើនណាស់មែនទេ? ហិហិ…ខ្ញុំក៏គិតមិនដល់ថាខ្លួនឯង មានរឿងច្រើនបានដាក់ចូលរួមក្នុងកម្មវិធីនេះច្រើនដល់ម្ល៉ឹងដែរ ប៉ុន្តែការសរសេរគឺជាចំណង់ចំណូលចិត្តមួយ ហើយខ្ញុំក៏ចង់ឃើញ មានគេបានអានរឿងដែលខ្ញុំសរសេរដែរ។  ដំបូងការសរសេរខ្ញុំមានចំនុចខ្វះខាតជាច្រើន ប៉ុន្តែក្រោយពីឆ្លងកាត់ការសរសេរច្រើន បានស្ដាប់ការបង្រៀនរបស់អ្នកគ្រូ ហើយអានអត្ថបទល្អៗនិងរឿងអ្នកគ្រូក្នុងវេបសាយរបស់គាត់ឬហ្វេសប៊ុកផេក ធ្វើឱ្យខ្ញុំដឹងថាខ្ញុំខ្លួនឯងមានចំនុចខ្វះខាត ត្រូវរៀនបន្ថែមត្រង់ណា ជំនាញខាងអ្វី និងចូលចិត្តសរសេរអ្វី។ បូករួមជាមួយការស្រឡាញ់ និងការចូលចិត្តអានសៀវភៅ ទើបខ្ញុំអាចតាក់តែងសាច់រឿងបានច្រើនបែបនេះ។ ដូច្នេះហើយ បើអ្នកមានបំណងចង់ក្លាយជាអ្នកសរសេរ អ្វីដែលចាប់ផ្ដើមដំបូងគឺសរសេរ…សរសេរទៀត…សរសេរអ្វីដែលអ្នកចង់ប្រាប់គ្រប់គ្នា រួចចែករំលែកប្រាប់ទៅកាន់គេផងដែរ…កុំកំណាញ់ទុកអានតែម្នាក់ឯង។

ចុងក្រោយ ខ្ញុំមានតែពាក្យអរគុណ អ្នកគ្រូម៉ីសនសុធារី និងក្រុមការងារដែលតែងតែជួយ ខ្នះខ្នែងជម្រុញឱ្យមានកម្មវិធីនេះឡើង និងអរគុណមិត្តអ្នកអានដែលតែងតែគាំទ្រស្នាដៃខ្ញុំមួយនេះ…អរគុណអ្នកអានគ្រប់គ្នានៅទីនេះ។

ចុចអាន MST Writerដែលមានអ្នកចូលអានច្រើនជាងគេប្រចាំខែកក្កដា

មកទល់ពេលនេះ កម្មវិធី MST Writer បានដំណើរការមកដល់រដូវកាលទី៣ក្រោមប្រធានបទ «អ្នកនិពន្ធដែននិរតី» ដែលបានចេញផ្សាយស្នាដៃមួយចំនួនជាផ្លូវការរួចមកហើយចាប់តាំងពីថ្ងៃទី១ ខែសីហា ឆ្នាំ២០២២ មកម្ល៉េះ។ ចាប់តាំងពី MST Writer រដូវកាលទី១ បានដំណើរការមក ក្រុមការងារនៅតែបន្តផ្តល់ជូនការលើកទឹកចិត្តជានិច្ច ចំពោះម្ចាស់ស្នាដៃដែលបានឈានដល់កំពូលមាតិកាទាំង២០ប្រចាំខែ។

១.ស្នាដៃរួមគ្នាពីក្រុមអ្នកនិពន្ធនាគា រឿង«សុបិនដើរ»

តំណាងក្រុមនាគាបាននិយាយថា នេះជាលើកទី២ហើយដែលស្នាដៃក្រុមរបស់ខ្លួនបានឡើងក្នុងលេខរៀងទី១១សម្រាប់តារាងទាំង២០ប្រចាំខែកក្កដា ដែលមានអ្នកចុចអានច្រើនជាងគេ។ ក្រោយពីបានទទួលដំណឹងភ្លាម សមាជិកក្រុមទាំងអស់ពិតជាសប្បាយរីករាយខ្លាំងមែនទែន ជាពិសេសមិននឹកស្មានថារឿងសុបិនដើរអាចទទួលបានការលើកទឹកចិត្តបែបនេះម្តងទៀតឡើយ។ សមាជិកក្រុមនាគាទាំងអស់សូមអរគុណដល់មិត្តអ្នកអានដែលគាំទ្រស្នាដៃរួមគ្នាមួយនេះតាំងពីដើមមក។ សូមអរគុណ!

២.អ្នកនិពន្ធទសប៉ាកកា ម្ចាស់រឿង«ម្ចាស់សារសម្ងាត់»

ចំពោះស្នាដៃមួយនេះ គឺជារឿងស៊ើបអង្កេតរួមគ្នារបស់ក្រុមទសប៉ាកកា ហើយបានចេញផ្សាយនៅលើវេបសាយ meysansotheary.com។ សម្រាប់ការទទួលបាន Top 16 នេះផងដែរក្នុងនាមជាអ្នកសរសេរផ្ទាល់ ខ្ញុំពិតជាមានទឹកចិត្តរំភើបដែលរឿងស៊ើបអង្កេតមួយនេះ ទទួលបានការគាំទ្រពីសំណាក់អ្នកអានរហូតអានឈានដល់ ប្រចាំខែកក្កដា។ ខ្ញុំសូមអរគុណដល់ប្រិយមិត្តអ្នកអានសម្រាប់ការចូលចិត្ត និងអរគុណដល់ក្រុមការងារ MST Writer ដែលបានចេញផ្សាយកម្រងរឿងស៊ើបអង្កេតមួយនេះ។

៣.អ្នកនិពន្ធ ប៉ូណា រ៉ូហ្សា ម្ចាស់រឿង«ព្រះរាជបុត្រាកំពូលស្នេហ៍»

ជម្រាបសួរបងៗនិងប្អូនៗទាំងអស់គ្នា! នាងខ្ញុំ មីងអ៊ិ ជាម្ចាស់ស្នាដៃរឿង “ព្រះរាជបុត្រកំពូលស្នេហ៍” ដែលជារឿងរ៉ាវប្រលោមលោកខ្នាតខ្លី និយាយរៀបរាប់ពីស្នេហាខុសវណ្ណៈ ប្រឆាំងនឹងធម្មជាតិ របស់ព្រះរាជបុត្រានៃនគរភូមិភាគខាងលិច ជាមួយនឹងមន្ត្រីរូបស្រស់នៃនគរភូមិភាគខាងកើត។ “ព្រះរាជបុត្រាកំពូលស្នេហ៍” អាចនិយាយបានថា ជារឿងដែលខ្ញុំស្រឡាញ់ជាងគេ ក្នុងចំណោមរឿងផ្សេងៗទៀតដែលខ្ញុំធ្លាប់សរសេរ ព្រោះដំណើររឿងគឺវាប្លែកថ្មី មិនដដែលៗ ហើយឈុតឆាកនៅក្នុងរឿងទៀតសោត ក៏មានសឹងតែគ្រប់រសជាតិ មិនថារន្ធត់ កម្សត់ សប្បាយ ហួសចិត្ត និង ខឹង ស្អប់។ បើនិយាយឱ្យត្រង់ទៅខ្ញុំស្រឡាញ់ចរិតតួប្រុសក្នុងរឿងនេះខ្លាំងមែនទែន អ្នកទាំងអស់គ្នាជឿរឺអត់ថា មួយរឿងនេះ តួប្រុសនិយាយថាស្រលាញ់តែម្ដងគត់ ហើយខ្ញុំជឿថាអ្នកដែលមានរសនិយមក្នុងរឿងស្នេហាដូចគ្នាជាមួយខ្ញុំ នៅពេលអានរឿងនេះហើយប្រាកដជា បាក់ចិត្តស្រឡាញ់តួប្រុសដោយទប់មិនបាន។ ជាចុងក្រោយខ្ញុំមានតែសូមអរគុណដល់អ្នកទាំងអស់គ្នាដែលបានចំណាយពេលអានរឿងដែលខ្ញុំប្រតិដ្ឋឡើងមកនេះរហូតដល់ចប់ និងសូមអរគុណដល់បងៗដែលជាក្រុមការងាររបស់អ្នកគ្រូម៉ីសន សុធារី ដែលបានជួយពិនិត្យអក្ខរាវិរុទ្ធ និងកែកំហុសឆ្គងនានាដែលកើតមានឡើងដោយអចេតនា។

៤.អ្នកនិពន្ធ ជូហ្វី ម្ចាស់រឿង«នាងជាខ្ញុំ ឬខ្ញុំជានាង»

សួស្ដីមិត្តអ្នកអានទាំងអស់គ្នា នាងខ្ញុំជូហ្វី ជាម្ចាស់រឿង នាងជាខ្ញុំ ឬខ្ញុំជានាង ដែលបានដាក់ផ្សាយក្នុង MST Writer រដូវកាលទី២។ រឿង នាងជាខ្ញុំ ឬខ្ញុំជានាង ជាសាច់រឿងប្រភេទថ្មី ប្លែកពីរឿងមុនៗដែលខ្ញុំបានសរសេរនិងចេញផ្សាយដូចគ្នាក្នុង MST Writer រដូវកាលទី១។ ខ្ញុំពិតជាមានអារម្មណ៍រំភើបដែលសាច់រឿងមួយនេះបានចូលក្នុង នៅក្នុងខែនេះ។ ខ្ញុំសូមអរគុណក្រៃលែងដល់មិត្តអ្នកអានដែលតែងតែគាំទ្រដល់ស្នាដៃរបស់នាងខ្ញុំ។

៥.អ្នកនិពន្ធ វិនិទ្រា ម្ចាស់រឿង«គំនូររស់»

សួស្ដីមិត្តអ្នកអានទាំងអស់គ្នា! នាងខ្ញុំ វិនិទ្រា ជាម្ចាស់រឿង គំនូររស់។ នាងខ្ញុំមានអារម្មណ៍សប្បាយរីករាយជាខ្លាំងដែលរឿងរបស់នាងខ្ញុំបានចូលដល់តារាង Top 19 នៅក្នុងខែនេះ ថ្វីដ្បិតថាត្រូវចំណាយពេលយូរគួរសមដើម្បីឡើងមកដល់ត្រឹមនេះក៏នាងខ្ញុំនៅតែសប្បាយរីករាយចំពោះការព្យាយាមរហូតមានលទ្ធផលដូចជាពេលនេះ។ ជាចុងក្រោយសូមឱ្យមិត្តអ្នកទាំងអស់គ្នានៅតែបន្តអានស្នាដៃរបស់អ្នកនិពន្ធដទៃទៀតដើម្បីអោយពួកគេមានកម្លាំងចិត្តដើរបន្តទៅទៀត។ សូមអរគុណ!

៦.អ្នកនិពន្ធ យាន ស៊ីធៀន ម្ចាស់រឿង«លក្ខខណ្ឌខ្មោចស្រី»

ចំពោះចំណាប់អារម្មណ៍របស់ខ្ញុំវិញគឺពិតជាសប្បាយរីករាយណាស់ពេលឃើញស្នាដៃរបស់ខ្លួនជាប់ក្នុងតារាងកំពូលទាំង២០នេះ ព្រោះខ្ញុំមិនដែលផុសស្នាដៃអ្វីពីមុនមកទេ ហើយនេះជាលើកដំបូងបំផុតហើយដែលខ្ញុំបានទទួលជោគជ័យក្នុងការសរសេររឿងរបស់ខ្ញុំ ទោះវាជាជោគជ័យដ៏តូចមួយក៏ដោយ ខ្ញុំគ្មានអ្វីនិយាយក្រៅពីការរំភើបរីករាយទេ។ ហើយខ្ញុំពិតជាអរគុណខ្លាំងណាស់ចំពោះកម្មវិធីតែងនិពន្ធមួយនេះ ព្រោះវាបានផ្តល់ក្តីសង្ឃឹមនិងលើកទឹកចិត្តដល់អ្នកដែលចង់ក្លាយជាអ្នកនិពន្ធជាច្រើនឲ្យដាក់ប្រឡងស្នាដៃរបស់ខ្លួនតាមក្តីស្រមៃដែលគិតប៉ងកន្លងមក ព្រោះពេលខ្លះអ្នកដែលចង់ក្លាយជាអ្នកនិពន្ធគាត់សរសេររឿងបានហើយតែមិនដឹងបញ្ចេញស្នាដៃរបស់ខ្លួនតាមណា ហើយកម្មវិធីនេះបានជួយពួកគាត់ឲ្យសម្រេចនូវក្តីស្រមៃរបស់ខ្លួនបណ្តើរៗហើយ ខ្ញុំពិតជាអរគុណអ្នកគ្រូម៉ីសនសុធារី និងបងៗក្រុមការងារខ្លាំងណាស់ដែលបានបង្កើតកម្មវិធីដ៏ល្អមួយនេះ។

ចុចអាន MST Writer រដូវកាលទី១

ចុចអាន MST Writer រដូវកាលទី២

ចុចអាន MST Writer រដូវកាលទី៣

ចុចអាន MST Writerដែលមានអ្នកចូលអានច្រើនជាងគេប្រចាំខែមិថុនា

កញ្ញាអ៊ិន បូបូ អ្នកនិពន្ធមួយរូបនៅក្រុមទសប៉ាកកា ក៏ជាអ្នកដែលបានគ្រប់គ្រង​គម្រោងបណ្តុះបណ្តាល MSTWriter បីរដូវកាលមកហើយបានប្រាប់ឱ្យដឹងថា នេះគឺជាជំនួបលើកដំបូងសម្រាប់ក្រុមអ្នកនិពន្ធមកពីរដូវកាលទីមួយ ក្រោមប្រធានបទអ្នកនិពន្ធក្រៅសាលា។

កញ្ញាបញ្ជាក់ឱ្យដឹងបន្ថែមថា ក្រុមនេះមាន​គ្នា១០រូបជាមួយរហ័សនាមថា ឥន្ទ្រីយ៍ MST ដែលបានបញ្ចប់វគ្គសិក្សានិងទទួលបានលិខិតបញ្ជាក់ជាមួយនឹងលទ្ធផលស្នាដៃនិពន្ធមួយចំនួន។

ក្នុងពេលជាមួយ​គ្នានោះដែរ ពិធីការិនីក៏បានបើកឱកាសជូនដល់បណ្តាអ្នកនិពន្ធមកពីមជ្ឈដ្ឋានផ្សេងៗចូលរួមបញ្ចេញទស្សនៈ ចែករំលែកនូវបទពិសោធការងារអ្នកនិពន្ធដល់ប្អូនៗជំនាន់ថ្មី ចែករំលែកនូវកម្លាំងចិត្តនិងជួយគាំទ្រគ្នា ដែលនេះគឺជាការត្រួសត្រាយផ្លូវឱ្យមានគម្រោងកិច្ចពិភាក្សាជាបន្តបន្ទាប់នៅលើកក្រោយៗទៀត។ កញ្ញា អ៊ិន បូបូ បានបញ្ជាក់ទៀតថា ការជួបជុំ​នៅក្នុងរូបភាពណាក្ដី ក៏ដើម្បីកុំឱ្យអ្នកនិពន្ធខ្មែរជំនាន់ក្រោយដែលមានទេពកោសល្យពោរពេញទៅដោយការភ័យខ្លាច អៀនប្រៀននិងមានការបាក់ទឹកចិត្តមិនដឹងថា ត្រូវចុះផ្សាយស្នាដៃរបស់ខ្លួននៅទីណា និងហ៊ាន​ទទួលយកការ​កែតម្រូវ បទពិសោធបន្ថែម ដើម្បីជំរុញការងារសរសេររបស់ពួកគេ។

នៅក្នុងឱកាសនោះដែរយើងឃើញអ្នកនិពន្ធវ័យក្មេងជាច្រើន (នឹង​បញ្ចេញនៅអត្ថបទបន្ត) បានបញ្ចេញនូវបទពិសោធរបស់ពួកគេ នៅពេលដែលធ្លាក់ទឹកចិត្តខណៈកំពុងសរសេររឿងមិនទាន់បាន​បញ្ចប់ ឬមួយក៏សរសេរចប់ប៉ុន្តែមិនបានទទួលការគាំទ្រខ្លាំងក្លា។

នៅក្នុងចំណោមនោះ អ្នកនិពន្ធ ហ៊ុយ សារ៉ាត់ ដែលជាម្ចាស់ប្រលោមលោករឿងព្រហ្មចារី ដែលមានអ្នកអានរហូតដល់ជាងប្រាំមួយពាន់ដងនៅក្នុងរដូវកាលទីមួយ គិតចាប់តាំងពីខែឧសភា ឆ្នាំ២០២១ រហូតដល់ខែវិច្ឆិកាឆ្នាំដដែលបានលើកឡើងថា លោកផ្ទាល់ធ្លាប់រងនូវការបាក់ទឹកចិត្តហើយបោះបង់ចោលការសរសេរបញ្ចប់ នូវគម្រោងប្រលោមលោកជាច្រើនចំណងជើង ។ លោកថា ពីដំបូងមានសន្ទុះចិត្ត ក្រោយមកមានអារម្មណ៍ថាស្នាដៃមិនសូវទទួលបានលទ្ធផលល្អដូចការគិតទុក ក៏បោះបង់ចោលការសរសេរ។

ដោយសារការសរសេរជាការងារមួយលំបាក ត្រូវការ​ការតាំងចិត្តខ្ពស់ ត្រូវការអារម្មណ៍ល្អ និងត្រូវការកម្លាំងចិត្ត អ្នកនិពន្ធ ម៉ីសន សុធារី ដែលជាអ្នកផ្ដួចផ្ដើមឱ្យមានកម្មវិធីនេះឡើង បានរៀបរាប់ទៅកាន់អ្នកនិពន្ធទាំងឡាយក្នុងឱកាសនោះដែរថា ការលើកទឹកចិត្តគ្នាគឺជារឿងចាំបាច់ ពីព្រោះថានេះគឺជាការងារដែលទាមទារនូវការចែករំលែកចំណេះដឹង បទពិសោធ និងការជួយគ្នាទៅវិញទៅមកនៅ ជាពិសេស មិនគួរបញ្ចើចបញ្ចើរ ឬប្រញាប់ក្នុងការដាក់ខ្លួនឯងធៀបជាមួយ​អ្នកនិពន្ធដែលមានពិសោធខ្ពស់ពេកទេ នេះនាំឱ្យបាក់ទឹកចិត្ត។

អ្នកស្រីបន្ថែម​ថា អ្នកនិពន្ធ គួរកុំបញ្ឈប់ការសរសេរដោយគ្រាន់តែមិនទាន់ទទួលបានកម្រៃដូចគេមុនៗ ដោយ​ថយមក​សិក្សានូវគន្លឹះបច្ចេកទេសសរសេរបន្ថែមជានិច្ច ក៏ដូចជា ការស្តាប់ តាមដានការ​វិវឌ្ឍថ្មីនៅក្នុងនិន្នាការនៃសហគមន៍ដែលខ្លួនចង់បង្កើតក្រុមអ្នកអានរបស់ខ្លួន ថាកម្រិតណា គួរសរសេររឿងណា។ សូម្បីការជួបជុំបែបនេះ អ្នកនិពន្ធទាំងអស់នឹងអាចស្វែងយល់បានពីគ្នាទៅវិញទៅមកកាន់តែច្រើនឡើងថែមទៀត ទទួលបាន​ជាកម្លាំងចិត្តនៅក្នុងការដាក់ស្នាដៃរបស់ខ្លួនចេញជាសាធារណៈ ដែលជាយាននាំទៅដល់ការរីកចម្រើនក្នុងអាជីពតែងនិពន្ធ។

រីឯអ្នកនិពន្ឌ រត្ន័ ឆារ៉ានន់ ដែលទទួលបានជោគជ័យចូលក្នុងកម្រិតប្រលោមលោក Premium ដំបូងគេសម្រាប់អ្នកអាននៅ meysansotheary.com ក្រោមចំណងជើងថា «ភូមិគ្រឹះដែលខ្ញុំធ្វើការ» កញ្ញាបានសង្កត់ធ្ងន់ថានេះជាកម្មវិធីដ៏មានតម្លៃសម្រាប់អ្នកនិពន្ធជំនាន់ថ្មីដូចនាង ជាពិសេស​នាង​រឹតតែមាន​កម្លាំងចិត្តនិងរំភើបសឹងមិនដែលស្មាន​ដល់នៅពេល​អ្នកនិពន្ធខ្មែរ ប្រែមកជាលើកតម្កើងគ្នា និងលើកទឹកចិត្ត​គ្នា​ក្នុងគ្រាដែលវិបត្តិពិតជាមាន​សម្រាប់អ្នកខំ​កសាងស្នាដៃដំបូងៗ។

ជាមួយនោះ អ្នកនិពន្ធ អ៊ែលលីស អ៊ែលលីសដែលមានស្នាដៃដ៏ល្បីនៅក្នុងសំណុំរឿងក្ដីស៊ើបអង្កេតលាយឡំស្នេហាយុវវ័យជាច្រើនចំណងជើងមកហើយ ក៏បានចូលរួមចែករំលែកបទពិសោធដោយសោមនស្សរីករាយដែរថាអ្នកនិពន្ធទាំងអស់ គួរពុះពារបញ្ចេញនូវស្នាដៃរបស់ខ្លួន ទោះនៅក្នុងជំហានណាក្ដី ឱ្យតែប្រកបទៅដោយគុណតម្លៃនិងមានភាពជឿជាក់ ប្រាកដប្រជា នៅក្នុងបទនិពន្ធរបស់ខ្លួន នោះថ្ងៃណាមួយនឹងទទួលបាននូវចំណេះដឹងបន្ថែមឈានទៅដល់កម្រិត​ទទួលបាន​ជោគជ័យជាក់ជាមិនខាន។

នឹងមានអត្ថបទជាបន្តបន្ទាប់អំពីទស្សនៈរបស់អ្នកនិពន្ធជាច្រើនទៀតនៅក្នុងកម្មវិធីដ៏ល្អមួយនេះ។